Танзанияда йўловчи самолёт сувга қулади. Балиқчилар одамларни қутқарган

Самолёт бортида 43 киши бўлган. Уларнинг 19 нафари вафот этгани айтилмоқда. Фавқулодда хизматлар 26 кишини қутқариб қолган, уларнинг 2 нафари учувчилар бўлган. Аммо кейинроқ мамлакат бош вазири учувчилар олган жароҳатлари оқибатида вафот этганини маълум қилди.

Precision Air авиакомпаниясига тегишли ATR 42 самолёти Танзаниянинг йирик шаҳри Доруссаломдан Букобуга Мванзу орқали парвоз қилаётган бўлган. BBC мухбири билан суҳбатлашган гувоҳлардан бири Абдул Нури самолёт қандай чўкканини гапириб берди: «Бу жуда даҳшатли бўлди. Кўплар ваҳимага тушди, бақирди, йиғлади. Кутиш залида турганлар ҳам ваҳимага тушиб қолишди. Уларнинг аксари қариндошларини кутаётганди», дейди гувоҳ.

Нурининг айтишича, маҳаллий балиқчилар самолёт чўкканидан кейин қайиқда унинг яқинига бориб, бир неча йўловчини қутқариб қолгани ҳақида гапириб берган. Борт кузатувчиси орқа эшикни очишга улгурган, йўловчилар ўша ердан чиқиб қутилиб қолган.

Авиаҳалокат ноқулай об-ҳаво сабаб содир бўлгани айтилмоқда. Аммо самолёт қулаганидан кейин ёмғир тўхтаган ва қутқарувчилар одамларни қутқаришга етиб бора олган. Фавқулодда хизмат ходимлари ҳалокатдан кейин учоқни соҳилгача судраб бора олишган, самолёт сувга чўка бошлаган, соҳилга олиб келинганда унинг думигина кўринаётган бўлган.

Precion Air Танзаниянинг энг йирик хусусий авиакомпанияси ҳисобланади. Унга қисман Kenya Airways эгалик қилади.