Бугунги ёшлар бахтли, лекин мисли кўрилмаган муаммолар ичида. Иқтисодий ноаниқлик, иқлим инқирозлари, қуролли можаролар, ижтимоий адолатсизлик ва рақамли маданият ёшларга азоб беради. Дунё бўйлаб ҳар 8 кишидан биттаси руҳий носоғлом. Айниқса, 10-19 ёшдаги ёшларнинг ҳар 7 тасидан бири руҳий носоғлом экани вазият ташвишли эканини кўрсатади. Ўз жонига қасд қилиш эса глобал миқёсда ёшлар ўртасидаги ўлимнинг асосий сабабларидан бири бўлиб қолмоқда. Бош ассамблея залида йиғилишдан мақсад ҳам ёшларнинг руҳий саломатлиги ва фаровонлигига бағишланган янги глобал кампанияни расмий эълон қилиш эди.
“Биз бўлинган, тажовузкор дунёда яшаяпмиз. Биз ёшларимиз олдида қарздормиз, чунки келажак авлод учун дунёни бирлаштиришга мажбурмиз. Ва сўнгги 1,5 ой ичида АҚШ, Канада ва Мексикада дунёнинг ҳар бурчагидан келган миллионлаб одамларнинг йиғилганини кўрдик. Жаҳон чемпионати бир-бирига қаршиларни ҳам бирлаштираётганини кўряпмиз. Биз саноқли соатлардан кейин Испания ёки Аргентинадан қайси бири жаҳон чемпиони бўлишини билиб оламиз”, деди FIFA президенти БМТ минбаридан туриб.
БМТ бош котиби маслаҳатчиси, Ёшлар офиси раҳбари Фелипе Полиега кўра, бугунги дунё ёшлари уларни тушунадиган давлат раҳбарлари, етакчиларни истайди.
“Биз бу ерга футболни нишонлаш учун келмадик, бу ерга ёшларни ўзгартиришда футболнинг ўрнини тан олиш учун ҳам йиғилдик. Ёшларга бугун қийин, улар ёлғизликдан, ноаниқликдан ва можаролардан чарчаган. Сўнгги 2 йил давомида дунёнинг кўп давлатларига бордим, ҳар ерда руҳий саломатлик масаласи. Руҳий бузилиш бугун фақат статистикада эмас, ҳаётий ҳақиқатга ҳам айланди. Залдаги ёшлар уларни тушунувчи етакчиларни истайди. Ҳар 4 йилда дунё бирлашади, фақат футбол кўриш ёки ўйнаш учун эмас, балки бирлашиш учун. Глобал мажбурият бу – ёшлар билан бирлашиш”, дейди Полие.
Эслатиб ўтамиз, шу куни Ню Йоркдаги Trump Tower’да FIFA учун қабул маросими ҳам ўтказилди. Унда шахсан президент Трамп қатнашди. Бино атрофидаги кўчалар тўлиқ ёпилди, хавфсизлик кучайтирилди. Трамп билан кўришгач сўзга чиққан FIFA президентига кўра, Америка дунёни бирлаштирган ва Америка орзуси ҳам аслида шу эди. Маълумот сифатида айтиш жоизки, Испания ва Аргентина ўртасидаги финал ўйини 19 июль куни, Америка вақти билан соат тушликдан кейинги 15:00 да, MetLife стадионида бўлиб ўтади. Америкаликлар бу стадионни Ню Йорк – Ню Жерсей стадиони деб ҳам атайди.
АҚШдан Kun.uz учун махсус тайёрланди.
