Таниқли раққоса Қизлархон Дўстмуҳаммедова 77 ёшида вафот этди

Раққоса, ўзбек рақс санъатида ўз мактабини яратган «Ўзбекистон халқ артисти» Қизлархон Дўстмуҳаммедова 77 ёшида вафот этди. Бу ҳақда Маданият ва туризм вазирлиги ахборот хизмати хабар қилди.

У 1946 йил 25 октябрда Тошкент шаҳрида таваллуд топган. 1965 йилда Тошкент давлат университетини, 1977 йилда Тошкент театр ва рассомчилик санъати институтини (ҳозирги Санъат ва маданият институти) тамомлаган.

Меҳнат фаолиятини 1965 йилда Ўзбек давлат филармонияси балет солисти сифатида бошлаган ва 1989 йилга қадар фаолият олиб борган. Кейинроқ «Ўзбекистон» театр-студияси солисти (1989−1991), Тошкент давлат маданият институти, «Халқ мусиқаси» кафедраси ўқитувчиси (1991−1995), халқаро «Олтин мерос» хайрия жамғармаси қошидаги миллий мумтоз рақс дастасининг бош бадиий раҳбари сифатида (1999−2005) фаолият юритган.

Қизлархон Дўстмуҳамедованинг «Гўзал», «Тонг маликаси», «Гўзал тонг», «Интизор», «Бухоро юлдузи», «Севги таронаси», «Нозли» каби замонавий, шунингдек, «Муножот», «Тановар», «Мўғулчаи сегоҳ», «Қоракўзим», «Гулузорим», «Савти мискин» каби мумтоз рақслари машҳур.

«Шашмақом» телефильмида қатнашган (1972), «Тановар» рақс ансамбли (Сиэтл, АҚШ)да ўзбек рақсларини саҳналаштирган. АҚШ Ливия, Франция, Германия, Тунис каби мамлакатларда гастроль сафарларида бўлган.

Дўстмуҳамедова ижодига бағишлаб «Нафосат гулдастаси» номли фильм ишланган (1985). «Эл-юрт ҳурмати» ордени билан мукофотланган (2000).