Тошкентда метрода нотаниш аёлга шилқимлик қилган йигит 5 суткага қамалди

2024 йил 8 апрел куни Тошкент шаҳар жиноят ишлари бўйича Чилонзор тумани судида шаҳвоний шилқимликда айбланган йигитга нисбатан суд ҳукми ўқилди.

Gazeta.uz хабарига кўра, 2024 йил 1 апрел куни соат 14:10 ларда Тошкент шаҳри Чилонзор туманидаги метронинг «Чилонзор» йўналишидаги электропоезд вагони ичида 2003 йилда туғилган фуқаро А.Н. ўзига нотаниш бўлган аёлнинг бел ва танасининг бошқа қисмларини қўли билан ушлаган. 

Суд мажлисида сўралган ҳуқуқбузар А.Н. ўзининг юқорида кўрсатиб ўтилган ҳолатдаги айбига иқрорлигини, ҳақиқатдан ҳам аёлнинг белидан паст қисмини қўли билан ушлаганини, ҳозирда қилмишидан пушаймонлигини, бундан кейин бу каби ҳаракатларни содир этмаслигини билдириб, суддан енгиллик беришни сўради.

Суд томонидан А.Н. Маъмурий жавобгарлик тўғрисидаги кодекснинг 41−1-моддасининг 1-қисмида назарда тутилган (Шаҳвоний шилқимлик) ҳуқуқбузарликни содир қилган деб топилди ва унга нисбатан 5 (беш) сутка маъмурий қамоқ жазоси тайинланди.