Нидерландияда ўнг қанот партиялар коалиция тузишга келишиб олди

Нидерландиядаги тўрт ўнг қанот партия ҳукумат коалициясини тузишга келишиб олди. «Биз келишувга эришдик», деди «Озодлик партияси» (PVV)нинг ўта ўнгчи етакчиси Герт Вилдерс 15 май, чоршанба куни.

Коалиция таркибига PVV’дан ташқари ўнг марказчи Озодлик ва демократия учун халқ партияси (VVD), Фермерлик-фуқаролик ҳаракати ва «Янги ижтимоий келишув» партиялари кирган. Уларнинг етакчилари ушбу сиёсий кучлар парламентдаги фракциялари билан келишиб олишлари керак бўлади. Ҳужжат мазмуни 16 май куни оммага эълон қилинади. 

Янги бош вазир ким бўлиши ҳозирча аниқ эмас. Номзодлик муҳокамаси кейинроқ бўлиб ўтади, дея тушунтирди Вилдерс. Сиёсатчининг ўзи бир неча ҳафта олдин вазирлар маҳкамасига раҳбарлик қилишдан бош тортганини маълум қилган эди. 

Рютте вазирлар маҳкамаси истеъфога чиққанидан кейин навбатдан ташқари сайловлар 

2023 йил июл ойида Нидерландия бош вазири Марк Рютте вазирлар маҳкамаси истеъфога чиқишини эълон қилди, бу эса муддатидан олдин сайловлар ўтказилишига сабаб бўлди. Истеъфога Рюттенинг мамлакат миграция сиёсатини қатъийлаштириш таклифи сабаб бўлди, уни Нидерландия ҳукумати коалициясида иштирок этувчи тўрт партиядан иккитаси қўллаб-қувватламади. 

Қиролликда навбатдан ташқари парламент сайловлари 2023 йилнинг 22 ноябрида бўлиб ўтди ва 150 ўриндан 37 тасини олган ўнг қанот популистларининг ғалабаси билан якунланди. Бироқ, Вилдерснинг коалиция тузишга бўлган биринчи уриниши PVV музокарачиси истеъфоси туфайли муваффақиятсизликка учради. Март ойида томонлар янги вазирлар маҳкамаси аъзоларининг қарийб ярмини сиёсат билан боғлиқ бўлмаган, бироқ маълум бир масала бўйича эксперт бўлган кишилар ташкил этиши ҳақида келишиб олдилар.