Жаҳон | 09:31 / 05.06.2024
6837
2 дақиқада ўқилади

Турчак Путиннинг Олтой Республикасига раҳбарлик қилиш таклифини қабул қилди

Федерация кенгашининг биринчи вице-спикери Андрей Турчак Россия президентининг Олтой Республикаси раҳбарлигини ўз зиммасига олиш ҳақидаги таклифига рози бўлди. Путин билан шахсий учрашув ўтказилмади.

Фото: kremlin.ru

«Ягона Россия» партияси бош кенгаши котиби ва Федерация кенгашининг биринчи вице-спикери Андрей Турчак Олтой Республикасига раҳбарлик қилади. У Россия президенти Владимир Путиннинг бу таклифини қабул қилди, деб хабар қилди 4 июн, сешанба куни Россия давлат ОАВ.

Турчак «Олтой Республикаси раҳбари лавозимига сайланиш учун ўз номзодини қўйишини ва унинг аҳолиси қўллаб-қувватловини олмоқчи эканлигини маълум қилди», деб ёзади ТАСС.

Хабарларга кўра, Турчакка таклиф Путин билан шахсий учрашувсиз қилинган. Бу сиёсатчи «минтақа ишларига киришганида» юз беради, деб ёзади РИА «Новости». Олтой Республикасининг аввалги раҳбари Олег Хорохордин шу куни эрталаб истеъфога чиқишини эълон қилди ва қарорни «янги иш жойига кўчиб ўтиш» билан изоҳлади. Унинг қайси лавозимни эгаллаши айтилмаган.

Псков вилояти собиқ губернатори ва «Ягона Россия» бош кенгаши котиби

2009-2017 йилларда Андрей Турчак Псков вилояти губернатори бўлган. 2017 йилда у «Ягона Россия» бош кенгаши котиблигига сайланган.

2022 йил сентябр ойида «Проект» нашри Турчаклар оиласи 2014 йилдан бери сиёсатчининг дўстлари номига рўйхатдан ўтган Канндаги ҳашаматли вилладан мунтазам фойдаланиб келаётганини аниқлади. Унинг рафиқаси тез-тез Франция жанубига ташриф буюради, деб ёзади лойиҳа ҳаво саёҳатлари маълумотлар базасига таяниб. Қайд этилишича, у 2014 йилдан бери 20 мартадан кўпроқ парвоз қилган, охирги парвоз 2022 йил февралида кузатилган.

Мавзуга оид