АҚШ президенти Доналд Трампнинг ўғли, 48 ёшли кичик Доналд Трамп, 2026 йил август ойида Мўғулистонга ов қилиш учун келган ва у ерда икки кунни Халқаро бокс ассоциацияси раҳбари, Кремлга яқин ҳисобланган тадбиркор Умар Кремлёв билан биргаликда ўтказган, деб ёзмоқда Financial Times.
Умар Кремлёв (унинг ҳақиқий фамилияси Лутфуллоев) 2020 йилдан буён Халқаро бокс ассоциацияси (IBA) президенти лавозимини эгаллаб келади. Унинг бошқаруви даврида ташкилот «Газпром»дан ўнлаб миллион доллар миқдорида маблағ олган. 2023 йилда Халқаро олимпия қўмитаси молиялаштириш манбалари шаффоф эмаслиги туфайли IBA’ни бокс бўйича олимпия турнирлари ўтказиш ҳуқуқидан маҳрум этганди.
2024 йилда Кремл аввалроқ тадбиркор Сергей Петровга тегишли бўлган ва Путиннинг фармони билан вақтинчалик бошқарувга берилган «Ролф» автодилерининг янги эгасига айланди. «Проект» нашри ёзишича, Кремлёв «Ролф»ни Россия президенти қўриқлаш хизмати раҳбари Алексей Рубежний билан дўстлиги туфайли қўлга киритган. Бундан ташқари, Кремлёв лотерея ва букмекерлик бизнесида бир қатор активларга эга бўлди – бу ҳам Рубежний билан дўстлиги туфайли, деб ёзганди «Проект».
Кремлёвнинг номи Трамп оиласи билан ҳам боғланади. 2026 йил сентябрида ОАВ у кичик Доналд Трампнинг Баҳама оролларида ўтказилган тўй маросими харажатларининг бир қисмини тўлаб бергани ҳақида хабар тарқатганди. Шундан кейин АҚШ конгрессидаги демократлар текширув бошлади. Кейинроқ президент Трамп ўғли пулларни Умар Кремлёвга қайтарганини айтиб чиқди.
АҚШ президенти ўғли билан Мўғулистонга саёҳат хайрия кимошди савдосида ўйналган. Ғолиблардан бири тоғ эчкилари овида кичик Трампга ҳамроҳлик қилган. У ва Кремлёвдан ташқари (у кимошди савдосида иштирок этмаган) Республикачилар партиясининг узоқ йиллик ҳомийси Кевин Смолл ҳам Мўғулистонга келган.
Кичик Трамп Мўғулистон пойтахти Улан-Баторга август ойи охирида – Кариб денгизидаги хусусий оролда ўтказилган ва харажатларнинг бир қисмини айнан Кремлёв тўлаган тўйдан сўнг учиб келган. У пойтахтдан мамлакат ғарбидаги лагерга бир неча юз километрлик масофани босиб ўтган ва у ерда овчи гидлар, ҳайдовчилар ва ошпазларнинг кичик гуруҳи билан икки кун қолган. Кремлёв ҳам шу ерга етиб келган, бу сафарда унга АҚШ санкциялари остидаги «Восход» венчур фонди ҳамкори, тадбиркор Артур Мартиросов ҳамроҳлик қилган.
Кремлёвнинг ўзи 30 август куни телеграм-каналида эълон қилган видеоларида Мартиросов билан бирга Мўғулистонга келгани ҳақида гапиради ва ушбу сафардан кадрларни намойиш этади. Видеолардан бири остида Кремлёв шундай савол қўйган: «Овга муносабатингиз қандай?»
