Ўзбекистон ва Жанубий Корея раҳбарлари Тошкентдаги музокаралар якунларини юқори баҳолади

Ўзбекистон ва Жанубий Корея раҳбарлари Тошкентдаги музокаралар якунларини юқори баҳолади. Етакчилар музокаралар дўстона муҳитда, конструктив ва ишончли мулоқот руҳида ўтганини таъкидлади. 

Мирзиёев Жанубий Кореяни жаҳонда жадал тараққий этиб бораётган мамлакатлардан бири, Ўзбекистоннинг вақт синовларидан ўтган алоҳида стратегик ҳамкори эканини таъкидлади. 

– Жанубий Корея биздан анча олисда жойлашган бўлса-да, халқларимизнинг урф-одат ва қадриятлари, маънавий олами ва дунёқараши бир-бирига ўхшашдир. Биз яқин дўст сифатида олижаноб ва бағрикенг корейс халқи эришаётган катта муваффақиятлардан беҳад қувонамиз ва фахрланамиз, деди Ўзбекистон раҳбари. 

Мирзиёев корейс ҳамкасби билан музокаралар чоғида ўзаро манфаатли ҳамкорликни янада чуқурлаштиришнинг устувор йўналишлари белгилангани, янги режа ва марралар олинганини таъкидлади. Ҳамкорликнинг барча механизмларига тизимли тус бериш, товар айирбошлаш ҳажмини ошириш, ўзаро савдода мувозанатни таъминлаш муҳимлигига алоҳида эътибор қаратилди. 

Иқтисодий ҳамкорлик бўйича Ҳукуматлараро қўмита ва ташқи сиёсат идоралари ўртасида Стратегик мулоқотнинг биринчи йиғилиши натижалари юқори баҳоланди. 

Ўзбекистон раҳбари Жанубий Корея президенти билан бирга мамлакатимизга катта ишбилармонлар делегацияси келганини мамнуният билан таъкидлади. 

Бугунги бизнес форумида Жанубий Кореянинг 80 дан ортиқ етакчи компаниялари иштирок этаётгани ва 9,6 миллиард долларлик янги лойиҳалар тўплами тайёрлангани савдо-иқтисодий ҳамкорликка кучли туртки беришига ишонч билдирилди. 

Яқин йилларга мўлжаллаб Ўзбекистон-Жанубий Корея алоҳида стратегик шериклигининг янги юқори технологияли кун тартибини шакллантириш зарурлиги таъкидланди. 

Шу мақсадда етакчилар Ўзбекистонда минтақавий юқори технологик хаб ташкил этиш бўйича Стратегик дастурни тайёрлашга келишиб олдилар. 

Ўта муҳим минерал ресурслар, яримўтказгичлар, кимё, машинасозлик, “ақлли” қишлоқ хўжалиги, инфратузилма ва шаҳарсозлик, “яшил” энергетика соҳасидаги ҳамкорлик стратегиянинг таянч йўналишлари сифатида белгиланди. 

Ўзбекистон раҳбари корейс компаниялари билан ҳамкорликнинг айрим устувор йўналишларига тўхталиб ўтди. 

Масалан, ўта юпқа мис фолгаси, “яшил” водород, аммиак, агрокимё, яримўтказгичлар ва электротехника маҳсулотлари ишлаб чиқариш бўйича келишувлар мавжуд. Ўзбекистон автомобил русумлари қаторини кенгайтириш ва ишлаб чиқаришни кўпайтиришдан манфаатдор. Қишлоқ хўжалиги соҳасида Жанубий Кореянинг “яшил” ва “ақлли” технологияларини трансфер қилиш бўйича аниқ келишувларга эришилган. 

Жанубий Корея компаниялари давлат-хусусий шериклик асосида транспорт инфратузилмасини модернизация қилишда иштирок этади. 

Давлат раҳбарлари икки мамлакат ҳудудлари ўртасидаги ҳамкорликни кенгайтириш муҳимлигини таъкидладилар. 

Ўзбекистоннинг анъанавий ҳамкорлари – Эксимбанк, EDCF жамғармаси ва Жанубий Корея халқаро ҳамкорлик агентлиги (KOICA) билан шерикликни мустаҳкамлашга алоҳида эътибор қаратилди. 

EDCF билан умумий қиймати 2 миллиард доллар бўлган янги ижтимоий аҳамиятга эга лойиҳаларни молиялаштириш бўйича битимлар имзолангани мамнуният билан қайд этилди. 

Жанубий Кореянинг ривожланиш институтлари билан самарали ҳамкорликка яна бир ёрқин мисол – замонавий кўп тармоқли болалар клиникаси ишга туширилгани. Қўшма университет, катталар шифохонаси ва онкологик клиникага эга ноёб тиббий кластер қурилиши бўйича янги лойиҳаларни тезлаштиришга келишилди. 

Томонлар, шунингдек, касбий таълим ва меҳнат миграцияси, экология ва иқлим ўзгариши соҳаларида ҳамкорликни кенгайтиришга келишдилар. 

Музокаралар чоғида етакчилар минтақавий ва халқаро аҳамиятга молик масалалар юзасидан позициялар ўхшашлигини тасдиқлади. 

Мирзиёев келгуси йил Сеулда “Марказий Осиё - Жанубий Корея” форматидаги биринчи саммитни ўтказиш таклифини маъқуллади ва Юн Сок Ёлнинг Корея яриморолида тинчлик ва барқарорликни таъминлаш бўйича қатъий қадамларини қўллаб-қувватлади. 

Маданий-гуманитар соҳада томонлар 2025 йилни “Ўзбекистон ва Жанубий Корея ўртасидаги алмашинувлар йили” деб эълон қилишга келишиб олди. Унинг доирасида ўзаро маданият ҳафталиклари, ёшлар, таълим, тил ва спорт форумлари, санъат ва ҳунармандчилик кўргазмалари, туризм тадбирлари ўтказилади. 

Умуман, Ўзбекистон ва Жанубий Корея замонавий шароитларда ҳамкорликнинг янги моделини яратишга келишиб олди. 

– Ўзаро муносабатларимизда “Юқори технологик ва инновацион шерикликнинг янги даври” бошланмоқда. Бугун имзоланган Алоҳида стратегик шерикликни янада чуқурлаштириш ва ҳар томонлама кенгайтириш тўғрисидаги қўшма баёнот ва йигирмага яқин бошқа ҳужжатлар бу эзгу ниятларимизга хизмат қилишига аминман, – деди Мирзиёев. 

Таъкидланишича, барча келишувларнинг тўлиқ ва ўз вақтида бажарилишини таъминлаш мақсадида кенг қамровли “йўл харитаси” қабул қилинади.