Етти давлат UNRWA'нинг Исроилда тақиқланишига қарши чиқди

Германия, Франция, Буюк Британия, Канада, Австралия, Япония ва Жанубий Корея Исроил парламентининг Бирлашган Миллатлар Ташкилотининг Яқин Шарқдаги Фаластинлик қочқинларга ёрдам ишлари агентлиги (UNRWA) ишини жиддий чеклайдиган қонун лойиҳаларидан «чуқур хавотир билдирмоқда». Бу ҳақда 27 октябр, якшанба куни Буюк Британия ташқи ишлар вазирлиги эълон қилган етти давлат ташқи ишлар вазирликларининг қўшма баёнотида айтилади.

«UNRWA Ғазо сектори, Шарқий Қуддус, Ғарбий соҳил ва бутун минтақадаги фаластинлик қочқинларга муҳим ва ҳаётни сақлаб қоладиган инсонпарварлик ёрдами ва асосий хизматларни тақдим этади. Унинг ишисиз бу ёрдам ва хизматлар, жумладан, таълим, соғлиқни сақлаш ва Ғазода ёнилғи тақсимоти масаласи жуда қийинлашади», дейилади маълумотда.

Ташқи ишлар вазирлари Исроил ҳукуматини халқаро мажбуриятларини бажаришга, UNRWA имтиёз ва иммунитетларини сақлаб қолишга ҳамда барча шаклларда тўлиқ, тез, хавфсиз ва чекланмаган гуманитар ёрдам кўрсатиш, шунингдек, жуда зарур бўлган асосий хизматларни тақдим этиш бўйича ўз мажбуриятларини бажаришга «қаттиқ чақирди». 

UNRWA бош комиссари: Ғазо шимолидаги одамлар ҳалок бўлиши мумкин

Блокада остидаги Ғазо сектори шимолидаги фаластинликлар ҳалок бўлиши мумкин, дея ёзди БМТнинг Яқин Шарқдаги Фаластинлик қочқинларга ёрдам агентлиги (UNRWA) бош комиссари Филипп Лазарини ижтимоий тармоқда. У эксклавда ҳеч бўлмаганда вақтинчалик ўт очишни тўхтатишга чақирди.

У Исроил армиясининг қарийб уч ҳафтадан бери давом этаётган ўққа тутиши туфайли Ғазо шимолида қурбонлар сони кундан кунга ортиб бораётганига эътибор қаратди.

Ҳатто UNRWA ходимлари дори-дармон, озиқ-овқат ва ичимлик сувини топишда қийналмоқда, деб ёзади Лазарини.

UNRWA бош комиссари, шунингдек, Исроил ҳалок бўлганларнинг жасадларини олиб чиқишга ва инсонпарварлик ҳаракатларига тўсқинлик қилаётганига эътибор қаратди. «Йўлларда ва вайроналар остида қолган жасадлардан ўлим ҳиди ҳамма жойда сезиляпти», — дейилади нашрда.

Ғазо сектори шимолидаги фаластинликлар ўзларини ташлаб кетилгандек, умидсиз ва ёлғиз ҳис қилмоқда, дейди у. «Ғазо шимолидаги одамлар ҳар лаҳзани ўлим қўрқуви билан ўтказяпти. Ғазо шимолидаги ходимларимиз номидан мен ҳудудни хавфсизроқ жойга тарк этишни хоҳловчи оилаларга гуманитар ёрдам хавфсиз ўтишини таъминлаш учун бир неча соатга бўлса ҳам зудлик билан ўт очишни тўхтатишга чақираман», — деб ёзади UNRWA раҳбари.