АҚШ 2026 йил охирида Исроилга ёрдам кўрсатишни тўхтатади, чунки мамлакат энди бу кўмакка муҳтож эмас ва қурол-яроғларни мустақил равишда харид қилишга қодир. Бу ҳақда Оқ уй раҳбари Доналд Трамп Fox News телеканалига берган интервьюсида маълум қилди.
«Биз уларга 4 миллиард доллар бериб келдик — ҳозир ҳам беряпмиз — лекин йил охирига бориб бу тўловлар тўхтатилади», — деди у.
АҚШ етакчисининг сўзларига кўра, ушбу кўмак «товарлар ва пул маблағлари»ни ўз ичига олган.
Трамп бу ёрдамни тўхтатиш масаласини бир неча йил давомида Исроил бош вазири Бинямин Нетаняҳу билан муҳокама қилганини таъкидлади. Унинг сўзларига кўра, бу масалани Нетаняҳунинг ўзи кўтарган.
«Уларга бунинг кераги йўқ. Исроил — жуда фаровон мамлакат», — деди Трамп.
Fox News телеканалининг қайд этишича, амалдаги келишув 2028 йилга қадар ҳар йили тахминан 3,8 миллиард доллар миқдорида ёрдам ажратилишини назарда тутади.
Май ойида Нетаняҳу CBS News телеканалига берган интервьюсида яқин ўн йил ичида АҚШ ҳарбий ёрдамидан босқичма-босқич воз кечиш тарафдори эканини маълум қилган эди.
Мамлакатлар ўртасидаги молиявий муносабатларни қайта кўриб чиқиш зарурати ҳақидаги саволга жавоб берар экан, Нетаняҳу АҚШ Исроилга кўрсатадиган йиллик 3,8 миллиард долларлик ёрдами «босқичма-босқич тўхтатилиши керак»лигини таъкидлаган. Унинг сўзларига кўра, бу жараённи АҚШ Конгресси таркиби ўзгаришини кутмасдан, «ҳозирнинг ўзидаёқ» бошлаш мумкин.
Costs of War Project тадқиқоти маълумотларига кўра, 2025 йил октябрь ҳолатига АҚШ икки йил ичида Исроилга ҳарбий ёрдам кўрсатиш учун 21,7 миллиард доллар сарфлаган.
2025 йил март ойида АҚШ Давлат котиби Марко Рубио Доналд Трамп 20 январь куни АҚШ президенти лавозимига киришганидан буён унинг маъмурияти Исроилга тахминан 12 миллиард долларлик ҳарбий техника етказиб беришни маъқуллаганини маълум қилди.
