Жанубий Корея парламенти президентга импичмент эълон қилолмади

Жанубий Кореянинг ҳукмрон «Халқ ҳокимияти» партияси аъзолари Миллий ассамблеяда президент Юн Сок Ёлга импичмент эълон қилиш таклифи бўйича овоз бериш жараёнини бойкот қилиб, зални тарк этди, деб хабар берди Yonhap.

Қайд этилишича, мамлакат биринчи хоними Ким Гун Хига нисбатан «коррупция ва аралашиш» айбловларини текшириш таклифига овоз берган депутатлар навбатдаги овоз бериш жараёнида қатнашишдан бош тортган ҳолда зални тарк этган.

Президентга импичмент тўғрисида қарор қабул қилиш учун депутатларнинг 200 та овозини тўплаш керак, бу парламент аъзолари умумий сонининг 2/3 қисмини ташкил қилади. Миллий ассамблеядаги 300 ўриндан 192 тасига эга бўлган мухолифат блоки кўпчиликни қўлга киритиш учун ҳукмрон «Халқ ҳокимияти» партиясидан камида 8 депутатнинг қўллаб-қувватлашига муҳтож эди.

Юн Сок Ёл 2022 йилги президент сайловида айнан «Халқ ҳокимияти» партияси номидан иштирок этиб, ғалаба қозонган эди.

Президент Юн Сок Ёл 3 декабр куни мухолифатни «давлатга қарши фаолиятга» алоқадорликда айблаб, ҳарбий ҳолат эълон қилди. Шундан сўнг Мудофаа вазирлиги ҳарбий хизматчилари Миллий ассамблея биносига кирди.

Парламентнинг фавқулодда йиғилишида ҳарбий ҳолатни бекор қилиш таклифини 190 нафар депутат қўллаб-қувватлади. Миллий ассамблея маъмурияти расмийлари овоз беришдан кейин ҳарбий ҳолат «ўз кучини йўқотди» деб эълон қилди.

Парламентдаги овоз беришдан сўнг, президент ўз фикрини ўзгартирди, Вазирлар Маҳкамаси йиғилишини чақирди ва Вазирлар Маҳкамаси розилигини олгандан кейин ҳарбий ҳолат бекор этилганини эълон қилди. Кейинчалик халқдан узр сўради.