Климкин 9 октябр куни DW’га берган интервюсида АҚШнинг Жанубий Кореядаги мавқеи ва алоқалари келишмовчиликни юмшатишга ёрдам бериши мумкинлигини айтган.
«Масалан, америкаликларни жалб қилиш мантиқий қадам бўларди. Уларнинг у ердаги мавқеи анча яхши, ким билан гаплашишни билишади. Улар бу ишни жуда яхши, ҳатто моҳирона бажара олади», — деган собиқ вазир.
Унинг фикрича, бошқа ҳамкорлар ҳам ёрдам бериши мумкин, бироқ Климкин уларнинг номини очиқламаган. Бундай кўмак яқин истиқболда натижа бериши мумкинлигини қайд этган.
Собиқ вазир Украинанинг ҳамкорлари жараёнга аллақачон жалб этилган бўлиши мумкинлигини ҳам истисно қилмаган. Бироқ бу ҳақда ишончли маълумотга эга эмаслигини таъкидлаган.
Климкин Украинанинг Сеулда бир йилдан ортиқ вақтдан буён элчиси йўқлигини салбий ҳолат деб баҳолаган. Унинг айтишича, Жанубий Корея Россия билан муносабатларда мураккаб ёндашувга эга: айрим соҳаларда ҳамкорликни чеклашга, бошқаларида эса давом эттиришга интилмоқда.
Собиқ вазир Киев ва Сеул ҳали хавфсизлик соҳасидаги ҳамкорлик ҳамда визасиз тартиб каби муҳим масалаларда келишувларга эришмаганини ҳам айтган.
Дипломатик можаро Украина президенти Володимир Зеленскийнинг 23 сентябр куни БМТ Бош Ассамблеясидаги баёнотидан кейин бошланган. У 2025 йил январда Курск вилоятида Украина асирлигига тушган икки нафар шимолий кореялик ҳарбий Жанубий Кореяга топширилганини эълон қилган.
Сеул томонлар бу маълумотни ошкор қилмасликка келишганини билдириб, Киевдан узр сўрашни талаб қилган.
Украина Ташқи ишлар вазирлиги эса томонлар келишувни турлича тушунган, деган позицияни билдирган. Вазир Андрей Сибиха баҳс оммавий баёнотлар даражасига чиққанидан афсусланганини айтган.
Жанубий Корея ташқи ишлар вазири Чо Хеннинг таъкидлашича, Украина ТИВнинг узри Сеул кутган даражада бўлмаган. Шундан сўнг, 8 октябр куни Жанубий Корея Киевдаги элчисини чақириб олишга қарор қилган.
