Ҳокимлар ва футбол. Йил бошидаги мақсад ва харажатга яраша қандай натижага эришилди?
|19:21 / 21.12.20245 26311 мин
Ўзбекистонда вилоят ҳокимлари автоматик тарзда вилоят футбол ассоциацияси президенти ҳам саналиши боис, аксарият ҳудудлардаги футболга бўлган эътибор кўп жиҳатдан ўша ҳудуд ҳокимининг ушбу спорт турига қизиқиши даражасига боғлиқ бўлади.
Ушбу мавсум олдидан ҳам аксарият вилоят ҳокимлари жамоалар олдига чемпионлик вазифасини қўйган эди. Жумладан, Фарғона вилояти ҳокими Хайрулло Бозоров «Нефтчи», Наманган вилояти ҳокими Шавкат Абдураззоқов «Навбаҳор», Қашқадарё вилояти ҳокими Муроджон Азимов «Насаф» олдига чемпионлик вазифасини қўйган эди. Якунда воҳа клуби водий жамоаларини ортда қолдириб, жамоа учун қилинган катта харажатларни оқлади, дейиш мумкин.
Tribuna.uz сайти йил бошида аксарият клублар олдига қандай мақсад қўйилгани, клубларнинг йиллик тахминий харажати ва якунда қандай натижага эришганига назар ташлади.
«Насаф» жамоасининг 2024 йилги мавсум олди таништирув маросимида вилоят ҳокими Муроджон Азимов, клуб бош ҳомийси саналмиш «Шўртан газ-кимё мажмуаси» раҳбарияти иштирок этиб, 2024 йилда Қашқадарё аҳли жамоадан фақат ва фақат чемпионлик кутаётганини маълум қилди.
«Қашқадарё халқи анчадан буён севимли жамоамизнинг Ўзбекистон чемпионлигини қўлга киритишни орзу қилмоқда. Жорий йилда ушбу орзуни ушалишига бор кучимиз билан ҳаракат қилишимиз керак. Жамоамиз олдидаги мақсад ва вазифаларни бажариш учун вилоят раҳбарияти ҳар қандай ёрдамни аямайди», - дея таъкидлаган Азимов.
Жамоа номидан сўзга чиққан бош мураббий Рўзиқул Бердиев йил давомида «Насаф»ни қўллаб-қувватлаган барчага ўз миннатдорчилигини билдириб, янги мавсумда жамоа олдига қўйилаётган мақсад йўлида бирлашиб, вилоят аҳли узоқ кутган чемпионлик учун курашишга ваъда берган.
2024 йилги мавсум якуни: «Насаф» илк бор Суперлига чемпиони
Бош мураббий Рўзиқул Бердиев мавсумда жамоаси олдига қўйилган вазифани муддатдан аввал бажариб, илк бор чемпионликни боши узра кўтарди. Tribuna.uz сайтига маълум бўлишича, «Насаф»нинг йил бошида Суперлигадан ташқари, ОЧЛда ҳам иштирок этиши инобатга олиниб, йиллик бюджети тахминан 130 миллиард сўм атрофида белгиланган. Ўзбекистонда йиллик энг катта смета ва бунинг эвазига барқарор таркиб қилингани ҳам якунда «Насаф»нинг муваффақиятли одимини таъминлади.
Эътиборлиси, 2025 йилдан Қашқадарё вилоятининг ўзидан Суперлигада 3та жамоа - «Насаф» (Қарши), «Машъал» (Муборак) ва «Шўртан» (Ғузор) иштирок этади.
2024 йилги мавсум олдидан:
Мавзуга оид
«Чемпион бўлиш вақти келди» – Наманган вилояти ҳокими янги мавсум шиорини белгилади
«Навбаҳор» клубининг сўнгги йиллардаги муваффақиятида Наманган вилояти ҳокими ва жамоанинг биринчи рақамли ишқибози Шавкат Абдураззоқовнинг ҳисса катта бўлди. Вилоят раҳбари сўнгги 3 йилдан буён жамоа олдига чемпионлик мақсадини қўйиб келаётган бўлса-да, Самвел Бабаян мураббийлигидаги жамоа чемпионлик совринини Наманганга олиб кела олмади.
Тақдимот маросимида Наманган вилоят ҳокими клуб Осиё Чемпионлар Лигасида тарихий натижа қайд этганини таъкидлаб, «Чемпион бўлиш вақти келди», дея янги мавсум шиорини белгилади. Чемпионликни Тошкентдан Наманганга олиб келиш учун эса Одил Ҳамробеков, Фаррух Сайфиев, Сиёвуш Ҳақназарий, Руслан Жиянов, Гиорги Никабадзе сингари номдор ўйинчилар таклиф этилганини маълум қилганди.
2024 йилги мавсум якуни: «Навбаҳор» яна чемпион бўлолмади
Наманган клуби таркибга жалб этилган катта маошли футболчиларга қарамай Суперлигада чемпионлик курашидан чиққани маълум бўлгач, вилоят ҳокими Самвел Бабаянни истеъфога чиқарди. Клуб эса Сергей Лушан қўл остида чемпионатни бир амаллаб 3-ўринда якунлади ва бронза медалига эга чиқди.
«Навбаҳор» сўнгги йиллар давомида тахминан 70-80 миллиард сўм йиллик бюджети билан чемпионликка эриша олмагач, Наманган вилояти ҳокими катта бюджет совринга эга чиқишни кафолатлай олмаслигини тушунди шекилли, 2024 йил якунида жамоанинг катта маоши ўйинчилари Жамшид Искандеров, Одил Ҳамробеков, Фаррух Сайфиев, Тома Табатадзе, Филип Иванович, Йован Жокич, Сиёвуш Ҳақназарий сингари ўйинчилар билан хайрлашиб, таркибга наманганлик маҳаллий ўйинчиларни жалб этишга қарор қилди.
2024 йилги мавсум олдидан:
Хайрулло Бозоров: «Нефтчи»нинг бу йилги мақсади битта – чемпионлик!»
Фарғона вилояти ҳокими Хайрулло Бозоров сўнгги 4 йилдан буён «Нефтчи» клубига катта эътибор қаратмоқда. Бозоров йил бошидаги таништирув маросимида 2024 йилда жамоа олдига илк марта чемпионлик вазифаси қўйилгани ва бунинг учун барча шароитлар яратилганини маълум қилди.
«Бу йилги мақсад битта, бу ҳам бўлса фақат – чемпионлик! Бош мураббийи Виталий Левченко ва жамоамизга ишонаман. Мавсумга юқори даражада тайёргарлик кўрилди, таркиб кучайтирилди. Мавсум якунида сизлар билан жамоамизни қучоқ очиб, чемпионлик билан табриклаш насиб қилсин», - деди Хайрулло Бозоров футболчиларнинг тақдимот маросимида.
2024 йилги мавсум якуни: «Нефтчи» 5-ўринда
Виталий Левченко мураббийлигидаги Фарғона жамоасига йил бошида чемпионлик вазифаси қўйилган бўлса-да, «Нефтчи» мавсум давомида барқарор бўла олмади. Орада жамоадаги молиявий ҳолат яхши эмаслиги, маошларни тўлашда узилишлар бўлаётгани ҳақида хабарлар янгради. Охир-оқибат жамоа мавсумни 5-ўринда якунлади. Tribuna.uz манбасига кўра, йил бошида «Нефтчи» олдига чемпионлик вазифаси қўйилгач, клубнинг 2024 йилдаги харажатлари сметаси 100 миллиард сўмни ташкил қилган.
Катта харажатга қарамай, чемпионликка эришилмаган бўлса-да, вилоят ҳокими Хайрулло Бозоровнинг ташаббуси билан «Нефтчи» 2025 йилда ҳам чемпионликни мақсад қилган ва аллақачон таркибга номдор ўйинчиларни жалб қилди. Таклиф этилган янги легионерлардан бири Владимир Йововичнинг йиллик маоши 300 минг АҚШ долларини ташкил этиши айтилмоқда. Бу Фарғона клубининг 2025 йилги жами бюджетидан қарийб 4 миллиард сўм айнан черногориялик ушбу легионернинг маоши учун сарфланишини англатади...
2024 йилги мавсум олдидан:
Жаҳонгир Ортиқхўжаев «Пахтакор» олдига илк бор чемпионлик вазифасини қўймади
«Пахтакор» клубининг президенти саналмиш собиқ Тошкент шаҳар ҳокими Жаҳонгир Ортиқхўжаев «Пахтакор» ўйинчилари билан мавсум олди учрашувда клуб янгиланаётганини маълум қилган ва бу таркиб олдига чемпионлик вазифасини қўймади.
«Пахтакор» янгиланди. Сизларни кўриб кўзим қувнаяпти. 5-6 нафарингизни инобатга олмаса, барчангиз ёшсиз. Бундай имконият ҳар доим ҳам бўлмайди. Футболчининг спортдаги ҳаёти қисқа. 2 йил қаттиқ меҳнат қилинг, пул сизни ўзи қувсин. Мен сизлар билан ҳали катта лойиҳаларга қўл ураман. Энди клубнинг асосий стратегияси ёшларни Европага шу ернинг ўзидан сотиш бўлади. Бу эса миллий жамоамиз учун ҳам фойда. Ҳеч қачон майдонда ўзингизни хафа қилдирманг», - дея Ортиқхўжаевнинг сўзларини келтирган клуб матбуот хизмати.
2024 йилги мавсум якуни: «Пахтакор» 6-ўринда
Максим Шацких мураббийлигидаги «Пахтакор» олдига чемпионлик вазифаси қўйилмагач, асосан ёшларга таянган ушбу жамоа турнирни 6-ўринда якунлади. Мавсум якунида эса Ортиқхўжаев Драган Черган ва яна бир қатор тажрибали ўйинчиларни таркибдан четлатгани маълум бўлди.
Клуб раиси яқинда жамоанинг португалиялик янги бош мураббийини таништириб, «Пахтакор» 2025 йилда чемпионлик учун курашишини маълум қилди. Шацких эса унинг маслаҳатчиси сифатида фаолият юритишини айтиб ўтди. Ортиқхўжаев «Пахтакор»нинг 2024 йилдаги йиллик харажатлар сметаси учун қарийб 100 миллиард сўм сарфлагани, 2025 йилда эса клубнинг йиллик бюджети 100 миллиард сўмдан ошишини маълум қилди.
Қолган клублар қанча харажат қилди?
Суперлигада «Пахтакор»дан кейинги 7-ўринни«Сурхон» жамоаси эгаллади. Таниқли тадбиркор Бахтиёр Фозилов ва Eriell компанияси томонидан молиялаштирилган ушбу жамоанинг йиллик харажат сметаси тахминан 50-60 миллиард сўмни ташкил этган.
Про лигадан қайтган «Динамо» бу йил чемпионатда 8-ўринни эгаллади. Йил бошида вилоят ҳокими Эркинжон Турдимов жамоа олдига аниқ вазифа қўймаган бўлса-да, Вадим Абрамов жамоаси ўз ўйини билан мухлис ва мутахассислар эътиборига тушди. Хусусий «Agromir Group» компанияси томонидан молиялаштирилган ушбу клуб Суперлига-2024да энг кам бюджетга эга бўлгани ҳақида жамоа мураббийи матбуот анжуманида айтиб ўтган эди. «Динамо»нинг 2024 йилги йиллик бюджети тахминан 40 миллиард сўм бўлган. Самарқанд жамоаси янги ҳоким Адиз Бобоев раҳбарлигида қандай иштирок этишини 2025 йилги мавсумда кўрамиз.
Андижон вилояти ҳокими Шуҳрат Абдураҳмонов ва ЎзАвтоСаноат раҳбарияти йил бошида «Андижон» олдига чемпионлик вазифасини қўймаган бўлса-да, клуб юқори ўринлар учун курашиши кераклиги ҳақида гапирилганди. Мавсумда Александр Хомяков шогирдлари сенсацион тарзда Ўзбекистон кубоги-2024 ғолибига айланишди. Бунга жавобан клуб раҳбарияти ва вилоят ҳокими томонидан жамоа ўйинчиларига ғолиблик учун 200 миллион сўмдан мукофот пуллари берилган. Умуман олганда эса клубнинг йиллик харажатлар сметаси тахминан 45 миллиард сўмни ташкил этган. Клуб мавсумни 9-ўринда тугатди.
Суперлига жорий мавсумида лигада қолиш учун курашган ва якунда турнирни 10-ўринда якунлаган «Бунёдкор» клубининг йиллик харажатлар сметаси тахминан 100 миллиард сўм атрофида бўлган. Клуб «Ўзбекнефтгаз» томонидан молиялаштирилган.
Суперлигада 11-ўринни олган «Қизилқум» клуби одатдагидек Навоийдаги йирик саноат ташкилоти НКМК томонидан молиялаштирилди. Tribuna.uz маълумотларига кўра, Жамшид Саидов мураббийлигидаги «Қизилқум» клубининг йиллик бюджети тахминан 50 миллиард сўм атрофида бўлган.
Суперлига 2024 йилги мавсуми якунида элитадаги ўрнини сақлаб қолиш учун курашган ва айни дамда лигада қолиш-қолмаслиги номаълум бўлиб турган 3 жамоа - «Металлург», «Олимпик» ва «Локомотив» орасидан Про лигага равона бўлган Тошкент жамоасининг йиллик сметаси тахминан 65 миллиард сўм атрофида бўлган, «Металлург»нинг йиллик бюджети эса 50 млрд сўм атрофида қилинган. «Олимпик»нинг йиллик харажатлари сметаси ҳақида эса маълумот топишнинг имкони бўлмади.
Жамоа номидан сўзга чиққан бош мураббий Рўзиқул Бердиев йил давомида «Насаф»ни қўллаб-қувватлаган барчага ўз миннатдорчилигини билдириб, янги мавсумда жамоа олдига қўйилаётган мақсад йўлида бирлашиб, вилоят аҳли узоқ кутган чемпионлик учун курашишга ваъда берган.
