Норвегияда янги биноларда энди бомбапанагоҳлар ҳам қурилади. Ушбу амалиёт 1998 йилда бекор қилинганди

Норвегия ҳукумати 10 январ куни девелоперлар (янги кўчмас мулк объектларини қуриш билан шуғулланувчи тадбиркорлар) зиммасига янги биноларда бомбапанагоҳларни ҳам қуриш мажбуриятини юклашни режалаштирмоқда, деб хабар беради NRK телерадиокомпанияси.

«Атрофимизда ноаниқликлар ортиб бормоқда. Биз мамлакат аҳолиси ҳақида қайғуришимиз ва уруш ёки қуролли ҳужум каби ёмон сценарийни ҳам кўриб чиқишимиз керак», — дейди адлия ва жамоат хавфсизлиги вазири Эмили Мел.

Бундай талаблар майдони минг метр квадратдан ошадиган биноларга нисбатан қўлланади. Панагоҳ икки хил бўлади: биринчиси кимёвий ва радиоактив моддалардан, иккинчиси эса оддий қуроллардан ҳимояни таъминлаш керак.

Норвегияда 1998 йилга қадар ҳар қандай йирик турар жой комплексида бомбапанагоҳ бўлиши талаб этиладиган қонунчилик нормаси амалда бўлган. У бекор қилинганидан кейин мамлакатда бирорта ҳам янги бомбапанагоҳ қурилмаган.

Ҳукуматнинг маълум қилишича, ҳозирда Норвегияда 20 мингга яқин панагоҳ мавжуд. Уларга 2,5 миллион киши сиғади — бу мамлакат аҳолисининг 45 фоизи демак. Бошқа Скандинавия мамлакатларидаги бомбапанагоҳлар эса аҳолининг 70-90 фоизига мўлжалланган.