Маҳаллий тадбиркорлар электробус, автобус ва микроавтобуслар ишлаб чиқаришни бошлайди

Йўл хўжалиги соҳасида хусусий сектор фаолияти ривожлантирилади.

Фото: tutu.ru

2025 йилга мўлжалланган давлат дастури лойиҳаси муҳокама учун эълон қилинди.

Маҳаллий ишлаб чиқарувчилар томонидан жамоат транспорти эҳтиёжлари учун транспорт воситалари ишлаб чиқариш йўлга қўйилади.

Республикада электробус, автобус ва микроавтобуслар ишлаб чиқариш имкониятларини ўрганиб, маҳаллий тадбиркорлар ва тўғридан тўғри хорижий инвестициялар жалб қилиш ҳисобига ишлаб чиқаришни йўлга қўйиш лойиҳалари бошланади.

Йўл хўжалиги соҳасида хусусий сектор фаолияти ривожлантирилади.

Автомобил йўлларида автоматлаштирилган вазн ва ҳажм параметрлари назорати бўйича стационар ва кўчма шохобчалар ўрнатилади ва соҳага хусусий сектор жалб қилинади.

Бунда, 2025 йилда 40 та ўлчов-назорат шохобчалари ўрнатиладиган жойларни электрон онлайн аукцион савдолари орқали тадбиркорлик субъектларига бириктириш чоралари кўрилади.

Аутсорсинг асосида 260 километр йўлларни эксплуатация қилиш ишларига хусусий секторни жалб қилинади.