Ҳоланд «Манчестер Сити» билан келишувни 2034 йилга қадар узайтирди

«Манчестер Сити» форварди Эрлинг Ҳоланд «шаҳарликлар» сафида 2034 йилгача фаолият юритадиган бўлди.

Клуб расмий сайти 24 ёшли норвегиялик голеадор билан 9,5 йиллик шартнома имзоланганини эълон қилди. Унга кўра, Эрлинг 2034 йилнинг 30 июн кунига қадар «Манчестер Сити» шарафини ҳимоя қилади.

«Янги шартнома имзолагандан жуда хурсандман ва бу ажойиб клубда яна кўпроқ вақт ўтказиш имкониятига эга бўламан.

«Манчестер Сити» — ўзгача клуб, бу ерда ажойиб инсонлар ва фантастик мухлислар бор. Бундай муҳитда ҳар бир футболчи ўзининг энг яхши қирраларини намоён этишни истайди.

Шунингдек, мен Пепга, унинг мураббийлар штабига, жамоадошларимга ва клубдаги ҳаммага миннатдорчилик билдирмоқчиман. Чунки сўнгги икки йил ичида улар менга жуда катта ёрдам беришди. Энди мен «Сити»нинг ажралмас қисмиман. Мен ривожланишда давом этишни, ўз устимда ишлашни ва келажакда кўпроқ муваффақиятларга эришиш учун қўлимдан келган барча нарсани қиламан», - дейди Ҳоланд.