Зеленский: Лондон билан 100 йиллик келишувни бошқа давлатларга ҳам қўллаш керак

Володимир Зеленский Украина ва Буюк Британия ўртасидаги «100 йиллик ҳамкорлик» деб номланган келишув Киевнинг бошқа давлатлар билан муносабатлари учун намуна бўлиши мумкинлигини айтди. Бу мурожаат 16 январ, пайшанба куни Украина президенти сайтида эълон қилинди.

Зеленский: «Бу муносабатларнинг мутлақо янги формати»

Пайшанба куни эрталаб Зеленский ва Буюк Британия бош вазири Кир Стармер Киевдаги Мариинский саройида 100 йиллик ҳамкорлик шартномасини имзолаган эди. Унда мудофаа ва илм-фан соҳаларида ҳамкорлик қилиш, мамлакатлар ўртасида янги жамоатчилик алоқаларини яратиш кўзда тутилган.

«Бу принципиал жиҳатдан янги муносабатлар формати. Украина ва Буюк Британия ўртасидаги муносабатлар энди ҳар қачонгидан ҳам яқинроқ. Ва Буюк Британия билан юз йиллик ҳамкорлик тўғрисидаги шартномага киритилган баъзи нарсалар, албатта, бошқа давлатлар билан ҳам такрорланиши мумкин. Шериклик муносабатларимизни янада ривожлантириш, мудофаа, хавфсизлик соҳасида ҳамкорлик қилиш кўзда тутилган», деди Володимир Зеленский.

Унга кўра, 2025 йилда Киев Лондондан 6,6 миллиард доллар ҳарбий ёрдам олади. 3 миллиард доллардан ортиқ тўлов шартнома бўйича йиллик мажбуриятга айланади, деди Зеленский. «Бундан ташқари, келишув иқтисодий, технологик ва таълим соҳасидаги ҳамкорликни — мактабларимиз ва университетларимизни инглизлар билан ҳамкорликда ривожлантиришни ўз ичига олади. Шартноманинг махфий қисми ҳам мавжуд. Бизнинг тараққиётимиз учун ҳақиқатан ҳам барқарорлик ва имкониятларни қўшадиган нарса», дея қўшимча қилди Украина президенти.

У Стармер билан Украина дрон ишлаб чиқарувчилари билан учрашганини айтди. «Бу йил бизнинг дронларимиз ҳажми бўйича рекорд йил бўлиши керак», деб ваъда берди президент.