Украина Хавфсизлик хизмати (УХХ) ва Бош прокурор офиси президент Володимир Зеленскийнинг собиқ матбуот котиби Юлия Мендел жиноятда гумон қилинаётгани ҳақида хабар берди. УХХ матбуот хизмати хабарига кўра, Мендел Украинага қарши ахборот-қўпорувчилик фаолияти билан шуғулланмоқда.
Шу муносабат билан ҳуқуқ-тартибот идоралари унга нисбатан Украина Жиноят кодексининг бирданига иккита моддаси бўйича гумон эълон қилди: 111-модданинг 2-қисми (Ҳарбий ҳолат шароитида содир этилган давлатга хиёнат); 436-2-модданинг 2 ва 3-қисмлари (Россия Федерациясининг Украинага қарши қуролли тажовузини оқлаш, қонуний деб тан олиш, инкор этиш ҳамда унинг иштирокчиларини улуғлаш).
УХХ хабарига кўра, Мендел ўзининг оммавий чиқишларида ҳамда ижтимоий тармоқлардаги саҳифаларида эълон қилган постларида Украинани халқаро майдонда обрўсизлантирмоқда. Шунингдек, у Россия режимини Украинага қарши бошлаган уруши учун оқламоқда.
Мендел Украина ҳудудидан ташқарида бўлгани сабабли, ҳозир уни жавобгарликка тортиш чоралари кўрилмоқда. Тергов ҳаракатлари Бош прокурор офиси процессуал раҳбарлиги остида УХХ Бош тергов бошқармаси терговчилари томонидан олиб борилмоқда.
Аввалроқ Мендел Украина ва президент Володимир Зеленский шаънига бир қатор танқидий фикрлар билдирган эди. Хусусан, жорий йилнинг май ойида у Такер Карлсонга интервью бериб, унда Россия тарғиботига хос бўлган бир қатор даъволарни илгари сурган.
2026 йил август ойида эса Мендел Франциянинг Le Journal нашрига интервью бериб, унда Украина президентини гўёки «урушдан энг катта манфаат кўраётган шахс» деб атаган. Шунингдек, у Зеленскийни авторитаризмда ва коррупция муаммоларига кўз юмишда айблаган.
Сентябрь ойида Украина президенти Менделга нисбатан санкциялар жорий қилди. Давлат раҳбари Миллий хавфсизлик ва мудофаа кенгаши томонидан тасдиқланган шахсий чекловлар пакетини имзолади. Ушбу рўйхатга ёлғон ахборот ва тарғибот тарқатаётган ҳамда Россиянинг Украинага қарши тажовузини қўллаб-қувватлаётган жами 10 нафар Россия ва Украина фуқароси киритилган. Улар орасида Юлия Мендел ҳам бор эди.
