АҚШ президенти Доналд Трамп 20 январ куни Оқ уйга қайтганидан кейин 48 дақиқадан камроқ вақт ичида ўнлаб фармонларни имзолаган, бу ҳақда Оқ уйнинг ютуб-каналидаги видеоёзув орқали билиш мумкин. Қуйида Трампнинг президентлик лавозимидаги дастлабки қарорлари ҳақида қисқача.
Байден президентлиги даврида қабул қилинган 78 та қарорни бекор қилди
Доналд Трамп АҚШнинг олдинги президенти маъмурияти «популяр бўлмаган, инфляцияли, ноқонуний ва радикал амалиётларга муккасидан кетгани»ни айтган. Трамп ўз қарори билан Кубага «терроризм ҳомийси бўлган мамлакат» мақомини тиркаган, инфляцияни қисқартириш бўйича қонуннинг «яшил» бандларини бекор қилган, федерал хизматчиларга масофадан ишлашни тақиқлаган, шунингдек расмийлар ковидга қарши эмланиши лозимлиги бўйича талабни бекор қилган.
Туғилиш ҳуқуқи асосида АҚШ фуқаролигини олишни чеклаш
Трамп киндик қони тўкилган тупроқ ҳуқуқи (АҚШда туғилган ҳар қандай шахс ушбу мамлакатнинг тўла ҳуқуқли фуқароси ҳисобланиши принципи) бўйича фуқаролик олишни бекор қилишга қаратилган фармонини имзолаган. Бу ҳуқуқ АҚШ Конституцияси билан кафолатланган ҳамда 1898 йилда Олий суд томонидан тасдиқланган. Фуқаролик ҳуқуқлари ва эркинликлари ҳимояси бўйича гуруҳлар коалицияси 20 январ куни Трампнинг фармони ижро этилишини тўхтатишга уриниб, судга даъво киритган. Калифорния ва Ню Йорк каби штатлар прокурорлари фармонга эътироз билдириши кутилмоқда.
Иммиграция ва бошпана тақдим этиш бўйича кенг қамровли чекловлар киритилди
Трамп ноқонуний мигрантлар оқимини тўхтатиш учун Америка-Мексика чегарасида фавқулодда ҳолат эълон қилиш тўғрисидаги фармонини имзолади. Шунингдек, АҚШ президенти қочқинларни қабул қилишни тўрт ойга тўхтатиб туриш ва бошпана сўраган, аммо ушбу мақомни олиш талабларига жавоб бермайдиганларни чиқариб юборишни тезлаштиришга фармойиш берган. Трамп Америка-Мексика чегарасида турган ҳолда бошпана сўраган шахс даъвоси кўриб чиқиладиган даврда АҚШда эмас, Мексикада қолишини талаб қилувчи қоидани ҳам тиклаган. Бундан ташқари, Трамп Мексика наркокартелларини террорчилик ташкилотлари деб эълон қилган, бу эса ноқонуний миграцига қарши курашишда қуролли кучлардан фойдаланишга имкон беради.
Капитолий штурми иштирокчилари афв этилди
Трамп 2021 йил 6 январда Капитолийга бостириб киришда айбланганларнинг аксариятини «тўлиқ, ҳар томонлама ва сўзсиз афв этиш» тўғрисидаги фармонини имзолаган. Афв этилганлар сони 1500 га яқин. 14 кишига, жумладан Proud Boys ва Oath Keepers экстремистик гуруҳлари етакчиларига нисбатан чиқарилган ҳукмлар бекор қилинган.
