Туркияда меҳмонхонада содир бўлган ёнғин қурбонлари сони 76 кишига етди

Туркия шимоли-ғарбидаги Карталкая тоғ-чанғи курортидаги меҳмонхонада содир бўлган ёнғин оқибатида ҳалок бўлганлар сони 76 кишига етди, 52 кишининг шахси аниқланган, деди Туркия ички ишлар вазири Али Ерликая 21 январ, сешанба куни кечки пайт.

Аввалроқ 66 киши ҳалок бўлгани, 51 киши жароҳатлангани хабар қилинган эди. Ёнғин 12 қаватли ёғоч бинонинг тўртинчи қаватида бошланган. Ёнғин содир бўлган пайтда Болу вилоятидаги Grand Kartal меҳмонхонасида жами 238 нафар меҳмон истиқомат қилган, деди вазир.

Ёнғин бошланганидан кейин баъзи меҳмонлар меҳмонхона ойнасидан сакраган, камида икки киши ҳалок бўлган. Бошқалар эса боғланган чойшаб ва адёл ёрдамида ерга тушишга ҳаракат қилишди. Ёнғин жойига ўнлаб ўт ўчириш машинаси ва 38 та тез тиббий ёрдам машинаси жўнатилди. Меҳмонхонанинг тоғ ёнбағрида жойлашгани қутқарув ишларини қийинлаштирган.

Меҳмонхона эгаси қўлга олинди

Ёнғин 10 соатдан кейин ўчирилган. Ёнғинни ўчиришда 200 дан ортиқ киши иштирок этди. Болу вилояти губернатори Абдулализ Айдиннинг айтишича, ёнғин деярли назорат остида. Унинг сўзларига кўра, ёнғин келиб чиқиш сабаблари ҳозирча аниқ эмас.

Фожиа сабабларини аниқлаш бўйича суриштирув ишлари бошлаб юборилган ва бунинг учун олти нафар прокурор тайинланган. Тўққиз киши, жумладан меҳмонхона хўжайини қўлга олинди, деб хабар берди ИИВ раҳбари. Улар нимада айбланаётгани ҳозирча номаълум. Туркия президенти Ражаб Тоййиб Эрдўған 22 январни миллий мотам куни деб эълон қилди.

Машҳур Карталкая тоғ-чанғи курорти Кўрўғли тоғларида, Истанбулдан 270 километр узоқликда жойлашган. Таъкидлаганидек, айни пайтда Туркияда мактаб таътиллари давом этмоқда.