«Реал» аутсайдерга ютқазди, «Ливерпул» чемпионликка қараб кетмоқда. Кун ўйинлари
|17:32 / 02.02.202518 52122 мин
Мадридликлар сафида яна бир жиддий йўқотиш, Англияда аномал ҳисоб. Шанба оқшомида Европа футболида рўй берган асосий воқеалар, ўйинлардаги голлар ва турнир жадвалларидаги вазият.
Ўтган турда «Ноттингҳем» билан бу мавсум учун аномал воқеа рўй берганди. Ҳа, «Борнмут» ҳам кучли мавсум ўтказмоқда, фақат 0:5 — керагидан ортиқча эди. Аммо Нуну Эшпириту Санту бир ҳафта ичида «ўрмончилар»ни ўзига келтирди ва «Брайтон» билан ўйинни улар ўз услубида ҳисобни очиш билан бошлади. Аниқроғи, бунда Данкнинг АПЛдаги еттинчи автоголи қўл келди. Кўп ўтмай биринчи голда ҳам асосий ишни бажарган кичик бўйли Гиббс-Уайт (171 сантиметр) бурчакдан оширилган тўпни боши билан дарвозага йўллаб, мезбонларнинг ҳисобдаги устунлигини оширди.
«Брайтон» эса ниманидир ўзгартиришга уринди, аммо ҳеч қанақасига Зелсни доғда қолдира олмади. «Ноттингҳем» эса қарши ҳужумлардан фойдаланиб кетди ва Эланга шу куни уч голга ассистентлик қилди, унинг икки пасини Вуд голга айлантирди. Мезбонлар тўпурари пеналтини ҳам аниқ ижро этиб, гол бўйича ҳет-трик қилди. Ва бу тарихий воқеага айланди, чунки «Сити Граунд» юқори дивизионда 1987 йилдан буён ўз футболчилари ҳет-тригига гувоҳ бўлмаганди. Энди австралиялик ҳужумчи голлари сонини 17 тага етказди ва Салоҳ (21) ҳамда Ҳоланд (18) билан рақобатлашмоқда.
Қолаверса, ҳозирга қадар АПЛ тарихида фақат бир марта олдинги ўйинда 5+ гол ўтказган жамоа кейинги ўйинда шундай фарқ билан ғалаба қозониши кузатилганди. 1997 йил ноябрида «Шеффилд Уэнсдей» «МЮ»га ютқазган (1:6), кейин эса «Болтон»ни мағлуб этганди (5:0).
«Форест» энди тўпланган очколар сони бўйича «Арсенал»га етиб олди. Кейинги турларда жамоани қийин синовлар кутмоқда: сафарда «Фулҳэм» ва «Нюкасл», уйда «Арсенал» ва «Сити»га қарши ўйинлар.
Арне Слот ҳафта ўртасида ЕЧЛда натижаси аҳамиятсиз ўйинда иккинчи таркибни туширди (асосий таркиб футболчиларидан фақат Гакпо ва Робертсон бор эди) ва бу мавсумда фаворитларга қарши ўйинларда сенсация кўтара олган жамоа майдонидаги ўйинга куч тежади. Нидерландиялик ҳужумчи ўша ўйинда ҳам собиқ жамоаси ПСВ дарвозасига пеналтидан гол урганди, уч кун ўтиб эса Собослаи учун хавфли вазият яратиб берди, кейин эса пеналти ишлади. Нуқтага яқинлашган Салоҳ эса АПЛдаги фаолияти давомида бешинчи марта бир мавсумда урилган голлари сонини йигирматага етказди. Қолаверса, бу у барча турнирлар доирасидаги ўйинлар ҳисобга олинганида Европа клублари сафида урган 300-гол бўлди.
Кўп ўтмай «Борнмут» ҳам рақиб дарвозасини ишғол этди, аммо гол Семенйодаги офсайд туфайли бекор қилинди. Мезбонларнинг шу кунги энг фаол ҳаракатланган футболчиси иккинчи бўлим бошида яхши позициядан туриб зарба йўллади, Алисон жамоасини қутқарди.
Иккинчи бўлимнинг ярми «Борнмут» устунлигида ўтди ва «Ливерпул» жарима майдони ичидан туриб уч бор зарба берилди. Қолаверса, мезбонлар пеналти тепиши ҳам мумкин эди, аммо ҳакамлар тўп Трентнинг қўлига эмас, кўкрагига теккан деб топишди. 70-дақиқада эса меҳмонлар учун бирданига икки ёқимсиз ҳолат юзага келди. Трент жароҳат туфайли алмаштирилди ва рақиб ўта хавфли вазиятга эга бўлди. Аввалига Таверненинг зарбаси устундан қайтди, унга биринчи бўлиб етиб келган Клюйверт эса бўш дарвозани ишғол этолмади.
Шундан кейин «Ливерпул» бундай «Борнмут» билан таваккалчилик қилиш яхши эмас деган қарорга келди ва Салоҳ ўз услубида иккинчи голни урди - тўпни ўз қанотида қабул қилиб, олис бурчакни аниқ нишонга олди, дарвозабон жойидан қимирлашга ҳам улгурмади. Бу мисрлик ҳужумчи учун чемпионатдаги 21-гол бўлди.
Эндиликда мерсисайдликлар иккинчи ўриндаги «Арсенал» билан фарқни тўққиз очкога етказди, лондонликлар тур ўйинини бугун «Манчестер Сити»га қарши ўтказади. Қолаверса, «Ливерпул»да «Эвертон»га қарши кечадиган сафар ўйини ҳам бор.
Кейинги мавсумда Англия чемпионатига Чемпионлар лигасида қўшимча квота тақдим этилиши эҳтимоли юқори. Бу эса бешинчи ўрин аҳамиятини оширади, ҳозирда бу ўринни «Нюкасл» эгаллаб турибди. Аммо «қарғалар» рекорд даражадаги саккиз ғалабадан иборат сериядан кейин пасайишга учради. Жамоа ўтган турда Саутҳемптонда аутсайдерга қарши баҳсда кутилганидек ғалабага эришди, аммо қаторасига икки уй ўйинида ютқазди.
«Борнмут»га қарши ўйинда Эдди Ҳау шогирдлари умидсиз кўринганди, «Фулҳэм» билан ўйиннинг иккинчи бўлимида эса ҳисобдаги устунлик бой берилди. Ҳолбуки, мезбонлар ўйин тақдирини биринчи бўлимдаёқ ҳал қилиб қўйиши мумкин эди, Мерфининг голидан ташқари Лено бир қанча мураккаб зарбаларни қайтаришига тўғри келди, Тоналининг олис масофадан йўллаган зарбаси эса тўсинга тегди. Аммо иккинчи бўлимда айнан ушбу италияликнинг хатосидан кейин Раул Хименес мувозанатни тиклади. Кейин эса мексикалик ҳужумчи эстафетани Родриго Мунизга топширди, унинг ўрнига майдонга тушган бразилиялик жарима зарбаси ижро этилганида аъло даражада ҳаракат қилди. Энди тур ўйинини душанба куни «Вест Ҳэм»га қарши ўтказадиган «Челси»да «Нюкасл»дан бешинчи ўринни тортиб олиш имконияти бўлади.
Мадрид дербисига бир ҳафта қолганида «Атлетико» стратегик муҳим ғалабага эришди, Жулиано Симеоне эса отасини хурсанд қилишда давом этди. Ушбу вингер тўп олиб қўйилганидан кейинги қарши ҳужумларда айниқса аъло даражада ҳаракат қилмоқда. Бу сафар кичик Симеоне тўпни жарима майдонига қадар олиб бориб, уни Самуэл Линога етказиб берди ва ҳисоб очилди. Ўйинга қўшиб берилган дақиқаларда эса иккинчи бўлимда захирадан ўйинга қўшилган Гризманн ҳам ўз номини таблога ёздириб қўйди. Диего Симеоне юбилейига ажойиб совға олди. Аргентиналик мутахассис — ла лига тарихида 500 ўйин ўтказган саккизинчи мураббийга айланди. Чоло — барибир улар орасида алоҳида ўринга эга, чунки ундан бошқа ҳеч ким бундай кўрсаткични бир клуб бошқарувида қайд этмаган.
Карло Анчелотти эса муаммолар юзага келди, 15-дақиқадаёқ Рюдигер газонга қулади ва ўйинни давом эттира олмайдиган бўлди. Мавсумнинг муҳим даврида «Реал» мудофаа чизиғида бирорта ишончли ҳимоячисиз қолмоқда. «Манчестер Сити»га қарши ЕЧЛ ўтиш ўйинларида мураббий ихтиёрида фақат бир йилдан ортиқ вақт ўйнамаган Алаба, аслида таянч яримҳимоячиси Тшуамени, мавсум давомида иккинчи жамоадан жалб этилган Раул Асенсио ҳамда доимо захира футболчиси бўлиб келган Валехо танловлари қолади.
Дисквалификация туфайли сўнгги ўйинларни ўтказиб юборган Винисиус Жуниорнинг голи эса бекор қилинди. Бунга бутунлай бошқа ҳудудда бўлган Мбаппе ўз рақибини туртгани сабаб бўлди. Дастлабки 45 дақиқаликда бошқа вазиятлар бўлмади ва «Реал» танаффусга бу мавсум сафар ўйинлари учун энг ёмон кўрсаткичи билан йўл олди (3 зарба, 1 таси дарвоза соҳасига тўғри борган). Қаймоқранглилар мухлисларини юпантирадиган ягона яхши янгилик — дастлабки маълумотларга кўра, Рюдигернинг жароҳати жиддий эмас, аммо аниқ жавоб якшанба кунги текширувлардан кейин берилади.
Ўйиннинг иккинчи бўлими анча ҳужумкорроқ бошланди. Аввалига «Эспанйол»да ҳисобни очиш учун яхши вазият бўлди. Кейин Мбаппе қайтган тўпга ўткир бурчакдан зарба бериши устун нишонга олиниши билан якунланди.
«Реал» босимни кучайтирди, «Эспанйол» футболчилари толиққанига қарамай чидаб берди. Талаб қилинганида эса рақиб таваккалчилик билан ҳам тўхтатилди. Масалан, Мбаппе қарши ҳужумга ўтиб кетганида, Ромеро унинг ортидан ташланиб йиқтиди. Ҳакам эса бу вазият учун фақат сариқ карточка кўрсатиш билан кифояланди. Бу вазиятда «Реал»нинг яна бир муҳим футболчиси сафдан чиқиши мумкин эди – қаттиқ оғриқ туфайли Килианга шифокорлар ёрдами талаб этилди, аммо у барибир майдонга қайтди.
«Реал» бутун кучини майдонга ташлаб, ғалаба учун ҳаракат қилди. Родриго ўнг қанотда Ромерони алдаб ўтиб зарба берди, тўп яна устунга борди. Мбаппе чап қанотдан ҳужумга ўтиб, кучли зарба берди, мезбонлар дарвозабони Гарсия қаҳрамонлик кўрсатди. «Эспанйол» мураббийи Гонсалес нолли дурангни сақлаб қолиш мақсадида бешинчи ҳимоячини туширишга қарор қилди.
Ва шунда «Эспанйол» гол урди. «Реал» доимо ўзи учун қулай бўлиб келган рақибни (ўзаро учрашувлардан 108 тасида ғалаба қозонган) барибир таслим этишга ортиқча ишониб юборди ва огоҳликни йўқотди. Каталонияликлар эса қарши ҳужумда имконият топиб, сондаги устунликдан фойдаланишди. Ўнг қанот ҳимоячиси Ал-Ҳилолий тўпни дарвозабон ҳудудининг нариги томонига етказиб берди, бу тўпга етиб келган Ромеро бир тегинишда дарвозани ишғол қилди. Мбаппега қўполлиги учун антиқаҳрамонга айланиши мумкин бўлган футболчи қаҳрамон бўлиб кетди.
Қўшимча дақиқаларда эса мухлислар шоу гувоҳига айланишди. «Реал»нинг 90+7-дақиқадаги сўнгги бурчак зарбаси вақтида Куртуа ҳам жарима майдонига етиб келди. Шунга қарамай, «Эспанйол» бардош берди ва ўз характери билан ғалабани сақлаб қолди. 21 зарба ва шундан еттитаси дарвоза соҳасига тўғри бориши жамоага бирорта гол тақдим этмади. Қаймоқрангилар бунгача чемпионатда фақат Мадридда «Барса»га қарши ўйинда гол уролмаганди. «Эспанйол» билан ўйинларда эса 2018 йилдан буён «Реал» майдонни голсиз тарк этмаганди.
Сўнгги ўринларда бораётган аутсайдер пешқадамни шок ҳолатига туширди ва чемпионатдаги интригани кучайтирди. «Сантяго Бернабеу»даги учрашувга бир ҳафта қолганида «Реал» ва «Атлетико»ни биргина очко ажратиб турибди. «Барса» эса 2 феврал куни «Алавес»ни мағлуб этолса, Анчелотти жамоаси билан орадаги фарқни тўрт очкога қисқартиради.
Барча куч ва ҳиссиётларини Чемпионлар лигасида «Барселона»га қарши ўйинда қолдирган бергамоликлар турнир жадвалининг ўрта қисмидаги «Торино»ни енга олмади. Энди «Наполи» ва «Интер» якшанба кунги ўйинлардан кейин янада илгарилаб кетиши мумкин. Паоло Ваноли бошқарувидаги жамоага қарши ўйин эса аввалбошдан «Аталанта» учун ёмон бошланди. Аввалига Белланованинг голи бекор қилинди. Кейин эса 30-дақиқада Колашинац жароҳат олиб, майдонни тарк этди. Бурчакдан ошириб берилган тўпни дарвозага йўллаган Жимситининг голига эса беш дақиқа ўтиб худди шу каби стандарт вазиятдан унинг амплуа бўйича касбдоши Марипан жавоб қайтарди.
Иккинчи бўлимдаги ҳал қилувчи вазият — Ретеги ишлаган пеналти бўлди, уни ҳимоячилар жарима майдони ичида футболкасидан тортиб газонга қулатишганди. Аммо форвард нуқтадан яхши зарба бера олмади, Ваня Милинкович-Савич бурчакка кучсиз борган тўпга етиб борди. Кейин эса сербиялик дарвозабон ҳиссиётларини тийиб тура олмади ва мезбон жамоа фанатларининг ҳақоратомуз муносабатига реакцияси учун огоҳлантирилди. Шундан кейин трибуналардан ирғитилган турли предметлар туфайли ўйинда тўхталиш юзага келди, аммо вазият тезда бартараф этилди. Сўнгги олти турда фақат бир ғалабага эришган Жан Пиеро Гасперини жамоаси учинчи ўринда қолмоқда ва ўзидан иккита кам ўйин ўтказган «Интер»дан уч очколик фарқ билан ортда қолмоқда.
«Бавария» кутилганидек бундеслига дебютанти билан ўйинда уч очкони қўлга киритди. Бу барчаси олдиндан тахмин қилиш мумкин бўлган ва фақат ҳисоб қандай кўринишда бўлиши номаълум бўлган ҳолатдир. 90-дақиқадан кейинги икки голи билан ҳам «Ҳолштайн» натижага таъсир кўрсата олмади, бу вақтгача «Бавария» уч гол фарқини юзага келтириб, натижани таъминлаб бўлганди. Айниқса Кейннинг дубли эътиборга молик, у биринчи бўлимга қўшиб берилган дақиқаларда ҳам иккинчи бўлим бошланиши билан Коман ва Рафаэл Геррейрунинг узатмаларидан кейин бошда голлар урди. Ҳарри бундеслигадаги юбилей — эллигинчи ўйинида майдонни голсиз тарк этолмасди ҳам. Бунгача турнир тарихида ҳеч ким шунча ўйинда 54 гол урмаганди.
Аввалига U-19 жамоасидан чақирилган Майк Туллберг дортмундликларнинг асосий таркибида фақат битта ўйинда ишлаши кўзда тутилганди. Аммо Нури Шаҳиннинг ўрнига мураббий қидириш ва музокаралар чўзилди, Нико Ковач эса олти ойлик шартномага рози бўлмаяпти, шундай экан, «Боруссия» раҳбарияти 39 ёшли данияликни мавсум охирига қадар ушбу лавозимда қолдириши мумкин. Нима бўлганда ҳам, Туллберг бошқарувида Гирассининг ўйини очилиб кетди. Ўтган мавсум тўпурарларидан бири бўлган ҳужумчи мураббий истеъфосидан кейинги уч ўйинда ҳам рақиб дарвозабонларини ранжитди. «Вердер»га гол, ЕЧЛда «Шахтёр» билан ўйинда дубл, энди эса — бурчак зарбасидан кейин аниқ зарба. Гирасси йил бошидан буён олти гол билан бундеслиганинг энг сермаҳсул футболчиси бўлиб турибди. Сафар ўйинларидаги камёб ғалабани эса «асаларилар»га намунали қарши ҳужумни аниқ зарба билан якунлаган Байер таъминлади.
Кейинги сешанба куни ҳам «ПСЖ» Чемпионлар лигаси ўтиш ўйинлари доирасида «Брест»га қарши илк ўйинни ўтказади ва Луис Энрике миллий биринчиликдаги репетициядан тўла қониқиш ҳосил қилиши мумкин. Аммо якуний 5:2 ҳисоби алдамчи, минимал устунлик бой берилганидан бош мураббий қаттиқ жаҳли чиқди (1:1), қолаверса, парижликлар устунликни ўзига қайтарганидан кейин ҳам хотиржамликка берилди ва яна бир гол ўтказиб юборди, мураббий ҳужум учлигидаги Кварахцелия, Барколя ва Дембелени майдондан олди. Бу триодаги учинчиси ҳозирда юқори формада ва ҳафта ичида иккинчи бор ҳет-трикка эришди.
Лига 1 ўйинларида Усмон 2016 йил мартидан буён бир ўйинда уч гол урмаганди, ўшанда у «Ренн» футболчиси сифатида — профессионал даражадаги илк мавсумида — «Нант» мудофаасини пароканда қилиб ташлаганди. Ҳозирда Дембеле 11 гол билан — Европада 2025 йил бошланганидан кейинги даврда энг яхши тўпурар бўлиб турибди. Аммо парижликлар мудофаасида камчиликлар сақланиб қолмоқда ва бунда Франция чемпионатининг охирги 14 ўйинида фақат икки бор дарвозаси дахлсизлигини сақлай олган Доннаруммани айблаш қийин. Аксинча, Жижи ҳисоб 3:2 ҳолатида муқаррар голдан қутқарди, кейин эса парижликлар захира ўриндиғидан тушган футболчилар мезбонлардаги стандарт вазиятлардан кейин қарши ҳужумга чиқиб кетиб, Гонсалу Рамушнинг дублини таъминлашди.
Кун статистикаси
«Вилярреал» бир йил давомида 2-марта беш нафар турли футболчилар гол урган ўйинда ғалаба қозонди. 2024 йил январида «сариқ субмариналар» «Барселона» билан ўйинда ҳам шундай натижага эришганди (5:3), бу сафар эса улар «Валядолид»ни тор-мор этишди (5:1).
«Эвертон» 14-марта ўйинларнинг илк дақиқасида гол урди, бу эса АПЛ рекорди саналади. «Ирислар»нинг «Лестер» дарвозасига Дукуре муаллифлигидаги голи ўйин бошлангани ҳақидаги ҳуштак чалинганидан 10,18 сония ўтиб урилди — бу турнир тарихида уй жамоалари учун энг тезкор гол бўлди.
«ПСЖ» қатарлик хўжайинлар қўлига ўтганидан кейинги даврда илк марта мавсумнинг дастлабки 20 турида 19 гол ўтказиб юборди.
