Украина президенти Володимир Зеленский 18 феврал куни Туркия президенти Ражаб Тоййиб Эрдўғаннинг таклифи билан ушбу мамлакатга ташриф буюради. Учрашув давомида «стратегик шериклик» ва икки мамлакат ҳамкорлигини мустаҳкамлаш масалалари муҳокама қилинади. Шунингдек, давлат раҳбарлари «Украинадаги сўнгги воқеалар ҳамда бошқа минтақавий ва глобал муаммолар ҳақида» фикр алмашади, деб ёзади дейди Туркия президенти маъмурияти вакили Фаҳриттин Альтун.
Душанба куни Туркия ТИВ раҳбари Ҳоқон Фидан Анқара Украинада тинчликни таъминлаш ва мамлакатнинг қайта тикланишига кўмаклашишда ҳар қандай ролни ўйнашга тайёрлигини билдирган эди. Унинг фикрича, келишувга эришиш «жуда қийин» бўлади. «Идеал дунёда, биз, албатта, Украинанинг ҳудудий яхлитлиги сақланиб қолишини хоҳлаган бўлардик. Аммо айни вақтда уруш давом этмоқда ва афсуски, ёқимсиз қарорларни қабул қилишга тўғри келади. Ҳозир томонлар ушбу танловни амалга оширишга уринмоқда: нимани бериш, нимани сақлаб қолиш, кейинроқ нима ҳақида гаплашиш мумкин», — дейди Фидан. Шунингдек, у можаронинг барча иштирокчилари, жумладан, тўғридан-тўғри жанг қилаётганлар ҳам ўз устуворлигини биринчи ўринга кўяётганини қайд этди.
18 феврал куни, шунингдек, Саудия Арабистонида АҚШ ва Россия вакилларининг учрашуви бўлиб ўтади. Зеленский Эрдўған билан учрашишини эълон қиларкан, Киев ушбу музокаралар ҳақида ҳеч нарса билмаслигини ва унда иштирок этмаслигини билдирди. Аввалроқ у Украинада «АҚШ президенти Доналд Трамп ва Европа»нинг тинчлик режаси пайдо бўлганидан кейин урушни тўхтатиш учун Владимир Путин билан музокаралар столига ўтишини таъкидлаган эди.
Аммо ҳозирча Вашингтон Зеленскийга фақат Украинанинг нодир металлари захирасидан фойдаланиш тўғрисидаги шериклик битимини тақдим этди холос. Ҳужжатга мувофиқ, Киев Америка ёрдами эвазига мамлакатнинг барча минерал ресурсларининг 50 фоизини АҚШга бериши керак. Зеленский хавфсизлик кафолатлари тақдим этилмагунча, битимни имзолашдан бош тортди. Кейинроқ у Украина ҳам «Исроил варианти» каби кафолатларни олишни хоҳлашини маълум қилди
