Ўзбекистон бўйлаб 1700 дан ортиқ масжидда хатми Қуръон ўқилади

Ўзбекистон мусулмонлари идораси тақдим этган ахборотга асосланиб, 2025 йил Ўзбекистонда муборак Рамазон ойининг бошланиши 1 март кунига тўғри келиши маълум қилинган эди.

Шу муносабат билан 28 февралдан Ўзбекистондаги 2100 дан ортиқ масжидда таровиҳ намози, уларнинг 1740 дан ортиғида эса Қуръони Карим тўлиқ хатм қилиш бошланмоқда.

Мусулмонлар идорасининг маълум қилишича, бунинг учун мазкур масжидларга 3,5 мингга яқин қорилар жалб этилган. Таровиҳ намози бугун 20:30 дан Тошкент шаҳридаги 126 та масжидда ҳам бошланади.

Шу билан бирга, Тошкент шаҳар ИИББ пойтахтда 28 февралдан бошлаб таровиҳ намози ўқиладиган вақтда — соат 18:00 дан 24:00 га қадар айрим масжидлар яқинидаги йўллар ёпилишини маълум қилганди.

Аввалроқ идора ҳудудларда таровиҳ намозининг бошланиш вақтларини эълон қилган эди. Унга кўра:

• Фарғонада – 20:20
• Наманганда – 20:20
• Андижонда – 20:20
• Тошкент вилоятида – 20:30
• Тошкент шаҳрида – 20:30
• Сирдарёда – 20:30
• Жиззахда – 20:30
• Самарқандда – 20:30
• Қашқадарёда – 20:40
• Сурхондарёда – 20:40
• Навоийда – 20:40
• Бухорода – 20:40
• Хоразмда – 21:00
• Қорақалпоғистон Республикасида – 21:10 да, хуфтон намозидан сўнг таровиҳ намози бошланади.

Шунингдек, Ўзбекистон мусулмонлари идораси 2025 йилги Рамазон тақвимини ҳам эълон қилди.