Шимолий Корея қўшини катта йўқотишлар туфайли Курск областидаги ҳарбий ҳаракатларда иштирок этмаётганга ўхшамоқда, деб хабар берди AFP Жанубий Корея разведкасига асосланиб.
«Афтидан, Россиянинг Курск областига жойлаштирилган шимолий кореяликлар қўшини январ ўрталаридан буён ҳарбий ҳаракатларда қатнашмаяпти», — дея Жанубий Корея миллий разведка хизмати (NIS) баёнотидан иқтибос келтирган агентлик.
Ўтган ҳафтада New York Times газетаси Америкадаги ва Украинадаги манбаларига асосланиб, КХДР ҳарбийлари катта йўқотишлар туфайли Украинадаги фронт чизиғидан олиб кетилганини хабар қилганди.
Нашр хабарида улар икки ҳафтадан буён, яъни январ ўрталаридан буён олдинги чизиқда кўриниш бермаётгани айтилганди.
Украиналик манбанинг айтишича, КХДР ҳарбийлари орасида йўқотишлар ортишига уларнинг сафларида кузатилган тартибсизлик ва рус бўлинмалари билан мувофиқлик йўқлиги сабаб бўлган. Улар жанг майдонига етиб келганидан бери ўз ҳолига ташлаб қўйилган, кам сонли зирҳли техникалар ёрдамида ҳаракатланган ва камдан кам ҳолларда қайта гуруҳланиш учун тўхтаган.
Шимолий Корея ҳарбийлари оғир йўқотишлар сабаб фронт чизиғидан олиб кетилгани тўғрисида 27 январ куни Sky News ҳам Украина махсус кучлари командирига таяниб хабар берганди. Унинг тахминича, КХДР аскарлари «украиналик ҳарбийлар билан дастлабки тўқнашувларга йўл қўйган хатоларидан хулоса чиқармоқда ёки ярадорларга қараяпти ёки қўшимча кучларни кутмоқда».
Америкалик амалдорларнинг ҳисоблашича, Шимолий Корея қўшини фронт чизиғидан олиб кетилиши вақтинча қарор бўлиши ҳам мумкин. Уларнинг сўзларига кўра, КХДР аскарлари қўшимча тайёргарликдан ўтганидан кейин ёки Россия қўшинлари кўплаб йўқотишлардан қочиш учун ушбу бўлинмаларни жойлаштиришнинг янги усулини топгач фронтга қайтиши мумкин.
Курск областида мингга яқин шимолий кореялик ҳалок бўлган
Ғарб расмийлари маълумотларига кўра, январ ойи ўрталарига келиб Курск областидаги Шимолий Корея қўшинининг жами йўқотишлари тўрт мингга яқин бўлиб, шундан мингга яқини ҳалок бўлган.
BBC’нинг хавфсизлик масалалари бўйича мухбири Фрэнк Гарднер қайд этишича, Курск областига 11 мингга яқин шимолий кореялик ҳарбий юборилганидан келиб чиқилса, бу жуда юқори кўрсаткич ҳисобланади.
Йўқотишлар ҳалок бўлганлар, яраланганлар, бедарак йўқолганлар ёки асир тушганларни ўз ичига олади. Ғарблик расмийлар анонимлик шарти билан мингга яқин ҳарбий хизматчи жангларда ҳалок бўлганини хабар қилишган. Бу жуда кўп йўқотиш ва у Шимолий Корея контингенти учун йўл қўйиб бўлмайдиган миқдор, дея қайд этган Гарднер.
