Европа Иттифоқининг ташқи ишлар ва хавфсизлик сиёсати бўйича олий вакили Кая Каллас Россиянинг Украинага қарши урушини тугатишга қаратилган тинчлик келишуви ЕИ иштирокисиз тузилиши мумкин эмаслигини билдирди.
«Биз Украина ва Россия қачон ва қандай қилиб тинчлик шартномасини имзолашини айта олмаймиз», — деди у 6 ноябр, жума куни Варшавада Болтиқбўйи минтақаси давлатлари ташқи ишлар вазирлари йиғилишидан сўнг.
Калласнинг қўшимча қилишича, ҳар қандай келишувни амалда бажариш учун Европа Иттифоқининг иштироки зарур бўлади.
Европа Иттифоқи ўз хавфсизлигига оид қарорларни ўзи қабул қилиши керак
АҚШ президенти Доналд Трамп Украина бўйича «жуда йирик кўламли» келишув тузилиши мумкинлигини эълон қилганидан сўнг, Европа Иттифоқи хавфсизлик масалаларида ўз суверенитетига урғу берди.
«Албатта, Европа Иттифоқининг ўз хавфсизлигига тааллуқли масалалар бўйича қарорларни айнан ЕИнинг ўзи қабул қилиши керак», — деди Европа комиссиясининг расмий вакили Брюсселда.
Шу билан бирга, у Украинада яқин вақт ичида тинчликка эришиш эҳтимоли пастлигини таъкидлади.
«Барчамиз тинчлик келишуви имкон қадар тезроқ тузилишини истаймиз», — деди у.
Бироқ бунинг учун Россия Украинага қарши давом эттираётган урушини тугатишга тайёр эканини кўрсатиши лозим.
«Бунгача ҳали узоқ йўл бор, чунки ҳозирча қарши томондан бу йўналишда жиддий ҳаракатни кўрмаяпмиз», — дея қўшимча қилди Европа комиссияси вакили.
Ўз навбатида, Берлинда ҳам Европа иштирокисиз ўтказиладиган музокаралар «натижа бермаслиги» таъкидланди.
Германия ташқи ишлар вазири Йоханн Вадефул Украинадаги урушни тинч йўл билан ҳал қилишда Европа «марказий рол» ўйнаши кераклигини билдирди.
Унинг сўзларига кўра, Германия ҳукумати қатъий тамойилга амал қилади: «Украинанинг келажагини Украинанинг ўзисиз, Европанинг хавфсизлигига оид масалаларни эса Европасиз ҳал қилиб бўлмайди».
«Бу Россиянинг тажовузкор урушини тугатишга қаратилган барча саъй-ҳаракатларимизнинг асосий мезонидир. Айнан шу сабабли Европа бу жараёнда марказий рол ўйнаши керак», — деди вазир.
