Италия бош вазири Жоржа Мелони Украинадаги урушни тўхтатиш бўйича музокараларда Европа Иттифоқи номидан ким иштирок этишини аниқ белгилашни талаб қилди.
«Европа Иттифоқи номидан музокаралар столига айнан ким ва қандай ваколат билан ўтириши масаласи узил-кесил ҳал этилишини талаб қилишда давом этаман», — деб ёзган Мелони Европа кенгаши раиси Антониу Коштага йўллаган мактубида. dpa агентлиги 5 ноябр, пайшанба куни ушбу мактубдан иқтибос келтирди.
Мелони ЕИдаги «ўзаро келишилмаган ҳаракатлар» на иттифоқчилар билан муносабатларда, на «бемаъни тажовузни тўхтатиш»га кўндириш зарур бўлган томонлар билан ишлашда фойда келтиришини таъкидлади.
«Ишончим комилки, Европанинг тартибсиз ҳаракат қилаётган қиёфасини намоён этиб, биз фақат бу урушни давом эттиришни истаганлар манфаатига хизмат қиляпмиз», — дея мактубдан иқтибос келтирди AFP агентлиги.
Мелони вакиллик масаласини Дублиндаги учрашувда муҳокама қилишга чақирди
Италия ҳукумати раҳбари Коштага йўллаган мактубида бу масалани Европа кенгашининг 13 ноябр куни Дублинда ўтадиган норасмий учрашувида муҳокама қилишни таклиф этди.
Мелонининг қўшимча қилишича, бу Европа кенгашига 17–18 декабр кунлари Брюсселда бўлиб ўтадиган саммитда Украинада тинчлик ўрнатиш бўйича музокараларда ЕИ номидан ким қатнашиши ҳақида расмий қарор қабул қилиш имконини беради.
Аввалроқ ҳам Мелони ЕИ давлатлари раҳбарларининг айрим ташаббусларини танқид қилган эди. Унинг фикрича, бундай ташаббуслар Россиянинг Украинадаги уруши бўйича ЕИнинг ягона позициясини заифлаштиради.
Хусусан, Рим Финляндия президенти Александер Стубб, Норвегия бош вазири Йонас Гар Стёре ва Россия президенти Владимир Путин ўртасидаги телефон мулоқотини танқид қилган.
Россия, Украина ва АҚШнинг навбатдаги музокаралари
АҚШ воситачилигида Россия ва Украина ўртасидаги музокараларнинг янги босқичи 10–11 ноябр кунлари Абу-Дабида бўлиб ўтади.
АҚШ президентининг махсус вакили Стив Уиткофф аввалроқ маълум қилганидек, учрашув «урушдан кейинги хавфсизлик, кескинликни пасайтириш, гуманитар ташаббуслар ва тинчлик сари кейинги қадамлар»га бағишланади.
