Тегишли ҳужжатлари бўлмаган ярим млрд сўмлик дорини сотаётган дорихона аниқланди

Денов туманида сифатини тасдиқловчи ҳужжатлари бўлмаган дори воситаларини сотувга қўйган дорихона фош этилди.

Фото: Бош прокуратура ҳузуридаги департамент

Бош прокуратура ҳузуридаги департаментнинг Сурхондарё вилояти бошқармаси томонидан тезкор тадбир ўтказилган.

Унда, Денов туманида фаолият юритувчи “E.O.” МЧЖга раҳбари Ш.А. МЧЖ дорихонасида турли номдаги сифатини тасдиқловчи ҳужжатлари бўлмаган умумий баҳоси 575,4 млн сўмлик жами 198,2 минг дона, шундан 1396 дона психотроп, 900 дона кучли таъсир қилувчи ҳамда 3146 дона яроқлилик муддати ўтган дори воситаларини савдога қўйгани аниқланиб, ушбу воситалар ашёвий далил сифатида олинган.

Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.