Зеленский АҚШнинг Россияга нисбатан «кучли қадамлари» ҳақида огоҳлантирди

Агар Россия Жиддада бўлиб ўтган музокараларда АҚШ ва Украина делегациялари келишиб олган 30 кунлик сулҳ шартларини қабул қилмаса, АҚШ «кучли қадамлар» қўяди, деди Украина президенти Володимир Зеленский.

«Украина Киевнинг тинчликка тайёрлигини кўрсатиш учун АҚШнинг 30 кунлик сулҳ таклифига рози бўлди. Мен жуда жиддий кайфиятдаман ва мен учун урушни тугатиш муҳим. Мен АҚШ президенти буни кўришини истайман.

Россия сулҳга рози бўлишининг эҳтимоли қандай? Келинг, кўрамиз. Агар Москва рад этса, Украина АҚШдан Россияга нисбатан кучли қадамлар кутмоқда. Ҳозирча тафсилотларни билмайман, лекин биз санкциялар ва шунга мос равишда Украинани [қўллаб-қувватлашни] кучайтириш ҳақида гапиряпмиз.

Москвага нисбатан «босим қадамлари» Вашингтонга ва Россия томони билан мулоқот натижаларига боғлиқ бўлади. Сулҳ тузилган тақдирда Украина учун хавфсизлик кафолатлари масаласи АҚШ билан музокараларда муҳокама қилинган, аммо батафсил муҳокама кейинроқ бўлади. Россияликлар Украинани АҚШ билан уриштириш учун ҳамма нарсани қилади. Саудия Арабистонидаги учрашув бу режаларни барбод қилади, деб ҳисоблайман. Аксинча, кескинлик юмшаши давом этмоқда», – деган Украина президенти. 

У можарони ҳал қилиш бўйича музокараларда ҳудудларни йўқотишни тан олиш – Киев учун асосий «қизил чизиқ» бўлишини айтди. 

«Биз Россия Федерацияси томонидан босиб олинган ҳудудларни уларники деб тан олмаймиз. Бу факт. Халқимиз бунинг учун курашди, қаҳрамонларимиз ҳаётини фидо қилди. Жуда кўп инсон яраланди, жуда кўп азоб чекилди. Шу сабабли ҳеч ким буни унутмайди. Мен „ҳеч ким унутмайди“ деганимда, бу биз учун асосий „қизил чизиқ“ эканини назарда тутяпман», – деди у.

Зеленскийнинг қўшимча қилишича, сулҳ бошланганидан кейин можарони тугатишнинг босқичма-босқич режаси ишлаб чиқилиши керак, у ҳарбий ҳолатни бекор қилиш ва сайловлар ўтказишни ўз ичига олади.

У Жиддадаги музокаралар арафасида Украина томонидан Россия ҳудудлари, жумладан пойтахт Москвага юзлаб дронлар билан ҳужум қилгани юзасидан ҳам изоҳ берган.

«Украина дронларининг Москвага ҳужуми кучни кўрсатиб қўйиш эмас, балки Россиянинг Украина билан қилаётган ишига адолатли жавобдир. Бугун, масалан, Кривий Риҳга зарбалар берилди. Сизнингча, бундай ҳолатдан кейин Украина қўшинлари жавоб берадими, йўқми? Урушни биз бошлаганимиз йўқ, лекин биз ҳақиқатан ҳам унинг тугашини истаймиз. Аммо одамларимизни ўлдириб, бунинг учун жавоб олмаслик – бунақаси кетмайди», – деган у.

Президент Украина қуролли кучлари Россия ҳудудидан чекинишига изоҳ бериб, қўшинлар Курск области ҳудудида вазифаларни бажараётгани, қўмондонлик эса жангчиларнинг ҳаётини сақлаб қолишга ҳаракат қилаётганини билдирди.

«Курск области ҳудудидаги қўшинларимиз ўз вазифаларини бажармоқда. Руслар бизнинг қўшинларимизга имкон қадар жиддий босим ўтказишга ҳаракат қилмоқда. [Украина] ҳарбий қўмондонлиги қилиши керак бўлган ишни қилмоқда: аскарларимиз ҳаётини сақлаб қолиш учун максимал ҳаракат қилмоқда», – деди Украина раҳбари.