IPI "Озодлик радиоси" ва АҚШнинг бошқа оммавий ахборот воситаларини ҳимоя қилиб чиқди

Халқаро матбуот институти (IPI) АҚШ президенти Доналд Трамп еттита давлат агентлиги, жумладан АҚШ Глобал медиа агентлиги (USAGM) фаолиятини тўхтатиш тўғрисидаги фармонни имзолаганидан кейин ёпилиши кутилаётган "Озод Европа/Озодлик радиоси" ва бошқа Америка оммавий ахборот воситаларини ҳимоя қилиб чиқди. «Ушбу ҳаракат бутун дунё бўйлаб автократларнинг имкониятларини кенгайтиради ва миллионлаб муқобил, ишончли янгиликлар ва ахборот манбаларидан маҳрум қилади», — дейилади IPI'нинг 17 март, душанба куни баёнотида.

Институт баёнотида таъкидланишича, USAGM томонидан бошқариладиган «Америка овози», «Озод Европа/Озодлик радиоси» «совуқ уруш давридаги Совет Иттифоқидан тортиб, бугунги кунда Эрон, Хитой ва Шимолий Кореягача» авторитар режимларга эга бўлган мамлакатлар учун муҳим ахборот манбалари ҳисобланади. «Учта нашр АҚШ Конгресси томонидан молиялаштирилади ва статистикага кўра, бутун дунё бўйлаб ҳафтасига 450 миллион ўқувчилар, томошабинлар ва тингловчиларни қамраб олади», деб хабар беради IPI. "Озод Осиё радиоси" президенти Бай Фанг Трампнинг қарорини «диктаторлар ва деспотлар учун мукофот» деб атаган.

IPI АҚШ ҳукуматидан ўз қарорини бекор қилишни ва ўз оммавий ахборот воситалари ва ходимларининг ишини ҳимоя қилишни талаб қилди.

Прага Европа Иттифоқида "Озодлик радиоси"нинг келажагини муҳокама қилмоқчи

Чехия ҳукумати Қўшма Штатлар молиялаштиришидан маҳрум бўлган Прагада жойлашган "Озод Европа/Озодлик радиоси"нинг келажагини Европа Иттифоқида муҳокама қилмоқчи. 16 март куни Чехия телевидениеси орқали ташқи ишлар вазири Ян Липавский: «Бундай эшиттиришларни давом эттириш Европа манфаатларига жавоб беради» деди.

У 17 март куни Европа Иттифоқининг бошқа давлатларидан келган ҳамкасблари билан учрашувда "Озодлик радиоси" фаолиятини давом эттириш масаласини кўтаришини айтди. "Озодлик радиоси" Чехия ва Европа учун нимани англатиши ҳақида сиёсий фикр юритиш керак, деди Липавский. «Бизнинг қўшнимизда тоталитаризм гуллаб-яшнамаслиги бизнинг манфаатларимизга мос келади», дея қўшимча қилди у.