Самарқанд шаҳридаги хусусий клиника раҳбари, Тошкент давлат тиббиёт университети изланувчиси, оториноларинголог Ҳасан Комиловга «Халқ саломатлиги посбони» кўкрак нишони топширилди.
Ҳасан Комилов шу йил 11 октябр куни самолётда аҳволи кескин ёмонлашган аёлнинг ҳаётини сақлаб қолганди.
Воқеа Тошкент – Сеул йўналишидаги HY511 рейсида рўй берган. Самолётда бўлган Ҳасан Комилов экипаж аъзолари билан биргаликда аёлга шошилинч тиббий ёрдам кўрсатган.
Ўшанда аёл шок ҳолатида бўлган, танаси кўкариб, совиб кетган. Тиббий ёрдамдан сўнг аёл ўзига кела бошлаган.
«Бу ҳолат шифокор учун қаҳрамонлик эмас, бу бизнинг ҳар куни қилаётган машаққатли меҳнатимиз», – деганди Комилов.
