ЕИ Кавказ ва Марказий Осиёда "Озодлик радиоси"ни қўллаб-қувватлайди

Брюссел "Озод Европа/Озодлик радиоси", хусусан, Кавказ ва Марказий Осиёдаги фаолиятини қўллаб-қувватлаш учун 5,5 миллион евро ажратилишини эълон қилди. Гап узоқ муддатли молиялаштириш эмас, балки қисқа муддатли ёрдам ҳақида бормоқда.

Фото: David W Cerny/REUTER

Европа Иттифоқи "Озод Европа/Озодлик радиоси"ни молиялаштириш учун 5,5 миллион евро ажратади. Европа дипломатияси раҳбари Кая Калласнинг 20 май, сешанба куни маълум қилишича, бу маблағлар ЕИга қўшни давлатлар, жумладан, Кавказ ва Марказий Осиёда трансляциялар учун сарфланади.

«Фильтрдан ўтказилмаган контент ўсиб бораётган даврда мустақил журналистика ҳар қачонгидан ҳам муҳимроқдир. Шунинг учун мен Европа Демократия жамғармаси билан 5,5 миллион евролик шартнома тайёрлаётганимизни эълон қилишдан мамнунман, бу "Озод Европа" радиосининг ҳаётий фаолиятини қўллаб-қувватлайди. Бу мустақил журналистикани қўллаб-қувватлаш учун қисқа муддатли фавқулодда молиялаштиришдир», — деди Каллас.

«Агар биз уларнинг бутун дунё бўйлаб ишларини молиялаштиришга қарайдиган бўлсак, Европа улар учун зарур бўлган барча маблағни ўз зиммасига олмайди. Биз ўз эътиборимизни «Озод Европа» радиосининг бизнинг қўшнимиздаги ва Кавказ ёки Марказий Осиё бўладими, "Озод Европа" радиоси орқали ташқаридан келаётган хабарларга жуда боғлиқ бўлган мамлакатларда ишлашига ёрдам беришга эътибор қаратишимиз керак», деди Каллас.

Унинг қайд этишича, "Озодлик радиоси"ни узоқ муддатли молиялаштириш учун ҳали ечим топиш керак. Аммо эркин оммавий ахборот воситаларини қўллаб-қувватлаш Европа Иттифоқи сармоясининг стратегик соҳаси бўлиб қолмоқда, дея қўшимча қилди еврокомиссар.

Май ойи бошида Швеция ҳукумати "Озодлик радиоси"ни қўллаб-қувватлаш учун 20 миллион швед крони (1,84 миллион евро) ажратди.