Журналистлар Украинада 121 минг россиялик ҳарбий ҳалок бўлганини тасдиқлади

Россиянинг Украинага кенг кўламли бостириб кириши бошланганидан бери ушбу урушда камида 121 507 россиялик ҳарбий ҳалок бўлди, уларнинг исмларини "Медиазона" ва Британиянинг BBC рус хизмати журналистлари кўнгиллилар жамоаси билан биргаликда аниқлади. Охирги маълумотлар 1 август, жума куни "Медиазона" томонидан тақдим этилган. 18 июлдан бери очиқ манбалардан яна 2353 та исм аниқланган.

"Медиазона" веб-сайтидаги статистик маълумотларга кўра, энг кўп ҳалок бўлганлар Бошқирдистон (5 889 киши), Татаристон (5 565), Екатеринбург (4 377) ва Челябинск (3 649) аҳолиси бўлган. Ҳалок бўлганларнинг 27,3 фоизи (33 152 киши) кўнгиллилар, 14,8 фоизи (17 964 нафар) маҳкумлар ва 11 фоизи (13 356 нафар) сафарбар қилинганлар. Энг йирик ёш гуруҳлари 33-35 (11 794 киши), 36-38 (11 614), 39-41 (10 625) ва 30-32 (10 366) бўлган. Украинада Россия армияси ва бошқа хавфсизлик кучларининг 5432 зобити, жумладан, 12 генерал ҳалок бўлган.

Журналистларнинг таъкидлашича, рус армиясининг урушдаги ҳақиқий йўқотишлари кўпроқ, чунки россиялик ҳарбийларнинг ўлими ҳақидаги барча хабарлар ҳам очиқ манбаларда эълон қилинмайди.

14 июл куни АҚШ президенти Доналд Трамп билан учрашувда НАТО бош котиби Марк Рютте Россия армияси биргина 2025 йил бошидан бери Украинада 100 минг аскарини йўқотганини айтди. Апрел ойида НАТО 250 минг киши ҳалок бўлгани ва 650 минг россиялик яралангани ҳақида маълумот берган эди.