“Жанг ортидан жанг” филми олтита “Оскар”ни қўлга киритди

Пол Томас Андерсон иккита “Оскар”га — энг яхши режиссёр ва энг яхши мослаштирилган сценарий муаллифи сифатида муносиб кўрилди.

Филмда рол ижро этган Шон Пенн энг яхши иккинчи пландаги эркак актёр деб топилди. Картина, шунингдек, кастинг учун ҳам тақдирланди — бу янги йўналиш ҳисобланади. Шунингдек, энг яхши монтаж ва бу иш учун масъул бўлган Энди Юргенсен ҳам алоҳида эътироф этилди. Шу тариқа филм жами олтита “Оскар”ни қўлга киритди.

Леонардо Ди Каприо, Шон Пенн, Бенисио дел Торо ва Тейяна Тейлор бош ролларни ижро этган Андерсон филми АҚШдаги сўл радикал гуруҳ аъзоларининг ҳаёти ҳақида ҳикоя қилади.

Энг яхши актёр ва актриса деб мос равишда Майкл Б. Жордан (“Гуноҳкорлар”) ва Жесси Бакли (“Ҳамнет: ‘Гамлет’га илҳом берган тарих”) топилди. Райан Куглернинг “Гуноҳкорлар” (Sinners, 2025) номли филми “энг яхши оригинал сценарий” йўналишида “Оскар” мукофотига сазовор бўлди.

Энг яхши иккинчи пландаги аёл роли йўналишида мукофотни Эми Мэдиган (“Қуроллар”) қўлга киритди.

“K-pop жин овчилари” (KPop Demon Hunters, 2025) номли фэнтези-мултфилми икки статуэткага эга бўлди: “энг яхши тўлиқ метражли анимацион филм” ва “энг яхши қўшиқ” учун.

Россия мактабидаги ҳарбий тарғибот ҳақида ҳикоя қилувчи Павел Таланкин ва Дэвид Боренштейннинг “Жаноб Ҳечким Путинга қарши” (Mr. Nobody against Putin, 2025) филми Америка киноакадемиясининг “энг яхши ҳужжатли филм” йўналишидаги “Оскар” мукофотини олди.

Россиялик режиссёр-аниматор Константин Бронзитнинг “Уч опа-сингил” номли қисқа метражли анимацион филми эса ғалабани Канаданинг “Марварид тўккан қиз” (The Girl Who Cried Pearls, 2025) филмига бой берди.