Ҳуқуқ ва бухгалтерия хизматларининг бозор ҳажми маълум қилинди

2025 йилнинг январ–октябр ойларида ҳуқуқ ва бухгалтерлик ҳисоби соҳасида кўрсатилган хизматлар ҳажми 4,1 трлн сўмни ташкил этди. Бу ўтган йилнинг мос даврига нисбатан 3,7 фоизга ёки 754,3 млрд сўмга кўпдир.

Миллий статистика қўмитасининг дастлабки маълумотларига кўра, ҳисобот даврида ҳуқуқ ва бухгалтерлик ҳисоби соҳасидаги хизматлар ҳажми барқарор ўсишни намоён этган. Жами ҳажм 4,1 трлн сўм этиб қайд этилган бўлиб, бу 2024 йил январ–октябр ойларига нисбатан 3,7 фоиз ёки 754,3 млрд сўмга кўпдир.

Тузилма кесимида эса ҳисоблар тузиш, бухгалтерия ҳисоби ва молиявий тафтиш (аудит) йўналишлари салмоқли ўринни эгалламоқда. Ушбу йўналишлар бўйича кўрсатилган хизматлар ҳажми 1,8 трлн сўмни ташкил этган бўлиб, ҳуқуқ ва бухгалтерлик ҳисоби соҳасидаги жами хизматлар ҳажмининг 43 фоизи шу сегмент ҳиссасига тўғри келади.

Бу каби кўрсаткичлар қонунчилик, молиявий ҳисобот, аудиторлик ва корпоратив бошқарувга доир хизматларга бўлган талабнинг ортиб бораётганидан далолат беради. Шундай бўлса-да, расмий идоралар мазкур рақамларни фақат статистик кўрсаткич сифатида эълон қилган бўлиб, соҳадаги сифат ўзгаришлари ва хизматлар географияси бўйича қўшимча таҳлиллар кейинроқ тақдим этилиши мумкин.

Тайёрлаган: Отабек Матназаров

#бухгалтерия #Ҳуқуқ