Амстердамда ЦАҲАЛ кантори чиқишига қарши намойишда 22 киши ушланди

Амстердамда Исроил Мудофаа армияси (ЦАҲАЛ) кантори Шай Абрамсоннинг чиқишига қарши норозиликлар вақтида 22 киши ҳибсга олинди. Бу ҳақда якшанба куни, 14 декабрда Нидерландия полицияси маълум қилди.

Кечқурун бир неча юзлаб киши Concertgebouw концерт зали ёнида тўпланди. Полиция “намойишчиларни масофада ушлаб туриш ва жамоат тартибини сақлаш” учун бир неча бор аралашган.

Намойишчилар тутунли шашкаларни ёққанидан кейин, AFP агентлиги хабар беришича, полиция ходимлари дубинкалардан фойдаланган. Ҳуқуқ-тартибот идоралари маълум қилишича, тўқнашувлар пайтида бир полициячи енгил жароҳат олган.

Қўлга олинган 22 кишининг барчасига йиғилишлар тўғрисидаги қонунни бузиш, пиротехника буюмларини сақлаш ва ҳибсга олиш вақтида қаршилик кўрсатиш бўйича айбловлар қўйилди.

Абрамсон 14 декабр куни кундузи яҳудийлар байрами — Ханука муносабати билан ўтказиладиган концертда чиқиш қилиши керак эди. Аммо унинг ЦАҲАЛ билан алоқалари сабаб чиқишга қарши намойишлар уюштирилди. Натижада кундузги оммавий концертда унинг иштироки бекор қилинди, бироқ Абрамсон кечқурун икки хил, ёпиқ ва камроқ томошабин қатнашадиган концертларда иштирок этган.

2024 йил 7 ноябр кечқурун Амстердамда Исроилнинг Тел-Авив шаҳридаги “Маккаби” клуби ва Нидерландиянинг “Аякс” жамоаси ўртасидаги футбол ўйинидан кейин ниқобли шахслар исроиллик мухлисларга ҳужум қилган. Ҳужумчиларнинг айримлари Фаластин байроқларини кўтариб, тегишли шиорларни қичқирган. Улар, шунингдек, исроилликлар тўхтаган меҳмонхоналарга кириб боришга ҳам уринган.

Маълумотларга кўра, шаҳарнинг турли ҳудудларида ўн нафардан ўттиз нафаргача исроиллик мухлис жабрланган. Полиция беш киши шифохонага ётқизилганини билдирган. Жабрланганларда калтакланиш асоратлари ва пичоқ жароҳатлари қайд этилган, 62 киши ушланган.

Сентябр ойида Белгиянинг Гент шаҳридаги Flanders Festival мусиқа фестивали ташкилотчилари Мюнхен филармония оркестри (Münchner Philharmoniker) концертини бекор қилди. Улар бу қарорни оркестрнинг бўлажак бош дирижёри — исроиллик пианиночи Лахав Шани экани билан изоҳлаган. Фестивал томонидан Мюнхен филармония оркестри чиқишининг бекор қилиниши Германия ҳукумат доираларида норозилик уйғотган.

36 ёшли исроиллик пианиночи Лахав Шани 2023 йилда Мюнхен филармония оркестрининг бош дирижёри этиб тайинланган. У бу лавозимда россиялик Валерий Гергиев ўрнини эгаллайди.

Бироқ Шани бу вазифага фақат 2026 йил сентябрда киришади, чунки у шу вақтгача Роттердам филармония оркестри билан шартнома асосида ишлайди.