Yangi Bank'нинг лицензияси бекор қилинди

Марказий банкка кўра, Yangi Bank устав капитали миқдорини белгиланган минимум даражага етказмаган, шунингдек, қонунчиликдаги айрим талабларни бажармаган. Банкнинг 32 526 та омонатчисидан 32 153 тасига давлат томонидан кафолатланган омонат маблағлари тўлиқ қайтарилади, 373 та ҳақдор эса омонатининг 200 млн сўмдан ортиқ қисмини қонунчиликда белгиланган тартибда қайтариб олиши мумкин.

Yangi bank

Ўзбекистон Марказий банки Бошқарувининг 15 январдаги қарори билан, “Yangi Bank” АЖ фаолиятини амалга ошириш ҳуқуқини берувчи лицензияси чақириб олинди.

“Мазкур қарор банк фаолиятида аниқланган камчиликларни бартараф этиш бўйича кўрилган чоралар етарли даражада самара бермагани, жумладан, устав капитали миқдорини қонунчиликда белгиланган энг кам талаблар даражасига етказилмаганлиги, шунингдек, банклар ва банк фаолияти тўғрисидаги қонунчиликда назарда тутилган айрим талаблар бажарилмаганлиги сабабли қабул қилинди”, – дейилади МБ ахборотида.

МБ қарори билан, банк фаолиятини белгиланган тартибда тугатиш белгиланди ва тугатиш комиссияси тайинланди.

Регуляторнинг қайд этишича, “Банклар ва банк фаолияти тўғрисида”ги қонунга мувофиқ, банк устав капиталининг энг кам миқдори 2025 йил 1 январдан бошлаб 500 млрд сўмни ташкил этиши лозим. Бироқ 2026 йил 1 январ ҳолатига кўра, “Yangi Bank” АЖнинг устав капитали 355 млрд сўмни ташкил этган.

Омонатчилар – 32 мингдан ортиқ

“Банклардаги омонатларни ҳимоя қилиш кафолатлари тўғрисида”ги қонунга мувофиқ, жисмоний ва юридик шахсларнинг банклардаги омонатлари давлат томонидан қонунчиликда белгиланган миқдорда кафолатланади. Кафолат доирасидаги компенсация миқдори 2025 йилда 200 млн сўмгача пасайтирилган.

Марказий банкка кўра, Yangi Bank омонатчиларининг кафолатланган омонатлари бўйича компенсация қонунчиликда белгиланган тартибда ва миқдорларда Омонатларни кафолатлаш агентлиги томонидан тўланади.

Дастлабки ҳисоб-китобларга кўра, жами мавжуд 32 526 нафар омонатчининг 32 153 тасига кафолатланган омонат суммалари тўлиқ қайтариб берилади (омонатлар тўлаб берилиши бўйича ҳисоб-китоблар Омонатларни кафолатлаш агентлиги томонидан эълон қилинади), 373 нафар фуқаро бўйича эса кафолатланган омонат маблағларидан қолган қисми тугатиш комиссиясининг қарорига кўра қонунчиликда белгиланган тартибда қайтарилади.

2025 йил 1 декабр ҳолатига, Yangi Bank'нинг омонат портфели 394 млрд сўм бўлиб, шундан 312 млрд сўми жисмоний шахслар, 83 млрд сўми юридик шахслардан жалб этилган. Ўша санага кредитлар қолдиғи эса 188 млрд сўм бўлган.

Марказий банкнинг қайд этишича, омонатчиларга маблағларининг қайтарилиши масаласи МБнинг доимий эътиборида бўлиб, жараён босқичма-босқич кузатиб борилади ва жамоатчиликка мунтазам равишда ахборот бериб борилади.

Омонат маблағлари бўйича компенсация тўланиши бўйича батафсил маълумотни Омонатларни кафолатлаш агентлигининг +998-55-550-05-00 рақамли ишонч телефони орқали олиш мумкин.

Yangi Bank ҳақида

“Yangi Bank” АЖ банк лицензиясини 2023 йил май ойида олган. Таъсисчиси – “Yangi Group” МЧЖ, 2020 йил июнда рўйхатга олинган. Бу компанияга 2019 йил ноябр ойида Сингапурда очилган “Yangi Holding Pte. Ltd.” эгалик қилади.

Yangi Bank ва Yangi Group'нинг раҳбари сифатида Смирнов Тимофей Валентинович кўрсатилган.

Муаллиф: Комрон Чегабоев

#Марказий банк #банк #Yangi Bank