Марказий банк бошқарувининг 2026 йил 23 октябрдаги 28/1-сонли қарорига мувофиқ “Open bank” акциядорлик жамиятига исломий банк фаолиятини амалга ошириш ҳуқуқини берувчи 1-I-сонли лицензия берилди. Бу ҳақда регулятор хабар қилди.
Мазкур лицензия “Банклар ва банк фаолияти тўғрисида”ги қонуннинг 5¹-моддасида назарда тутилган исломий молия операцияларини қамраб олади.
Марказий банк фуқароларга банк хизматларидан фойдаланишдан аввал унинг тегишли лицензияга эга эканини регуляторнинг расмий сайти орқали текширишни тавсия қилди.
Эслатиб ўтамиз, 2026 йил 27 мартда Ўзбекистонда исломий банк фаолиятини жорий этишга қаратилган қонун имзоланганди. Ҳужжат билан исломий банк фаолияти учун алоҳида лицензия жорий этилиб, исломий молия операциялари, инвестициявий омонатлар ва уларни солиққа тортишнинг ҳуқуқий асослари белгиланган. Шунингдек, Марказий банк ва тегишли банкларда исломий молия кенгашларини ташкил этиш назарда тутилган.
Июл ойида эса исломий банклар ва “исломий дарчалар”ни лицензиялаш тартиблари белгиланди. Унга кўра, банкда Марказий банк билан келишилган исломий молия кенгаши, малака талабларига жавоб берувчи масъул раҳбар ҳамда исломий молия стандартларига мувофиқлик сиёсати бўлиши талаб этилади.
Август ойида Марказий банк раиси ўринбосари Санжар Носиров Kun.uz’га берган интервюсида исломий хизматлар кўрсатишга талабгор банкларни лицензиялаш жараёни бошланганини маълум қилганди. У тўлақонли исломий банклардан олдин анъанавий банкларда “исломий дарчалар” очилишини кутаётганини айтган. Бундай дарчалар орқали аҳоли исломий, яъни инвестициявий омонатлар жойлаштириши ҳам мумкин бўлади.
