Bithumb криптобиржаси хато туфайли мижозларга 42 млрд долларлик биткойнни ўтказиб юборди

Бунга криптобиржа ходимининг акция қатнашчиларига бериладиган мукофотни Корея вони эмас BTC (биткойн) тарзида ёзиши сабаб бўлган.

Фото: Unsplash

Жанубий Кореянинг Bithumb криптобиржаси реклама акциясида иштирок этган 249 нафар фойдаланувчига хато туфайли 620 минг биткойнни (ҳозирги курс бўйича 42,6 млрд) ўтказиб юборди, деб хабар берди Yonhap агентлиги.

Хабарда айтилишича, акция 6 феврал куни маҳаллий вақт билан 19:00да ўтказилган. Криптобиржа 19:40да транзакциялар ва фойдаланувчилар ҳисобидан маблағ ечишни тўхтатиб қўйган. Bithumb 618 212 биткойнни дарҳол тиклаганини билдирди.

«Биз бу ҳолат ташқи таъсир ёки хавфсизликнинг бузилиши билан боғлиқ эмаслигини билдирамиз», — дейилади Bithumb баёнотида.

Yonhap агентлигининг ёзишича, бу ҳолатга криптобиржа ходимининг акция қатнашчиларига бериладиган мукофотни Корея вони эмас BTC (биткойн) тарзида ёзиши сабаб бўлган.

Жанубий Корея молиявий назорат хизмати ушбу ҳолатни текширмоқда.