Шимолий Корея биткоин захиралари бўйича дунёда учинчи ўринга чиқди

Arkham Intelligence компанияси маълумотларига кўра, криптовалюта ҳамёнлари эгалигини аниқлаш учун сунъий интеллектдан фойдаланган ҳолда ўтказилган тадқиқот Шимолий Корея ҳакерлар гуруҳи Lazarus (улар TraderTraitor номи билан ҳам маълум) 13 минг 580 биткоинга эгалигини кўрсатди. Бугунги кунда бу миқдор тахминан 1,15 млрд доллар баҳоланмоқда.

Натижада, Шимолий Корея криптовалюта захиралари бўйича дунёда учинчи ўринни эгаллади. Биринчи ўринда 16,5 млрд долларлик захира билан АҚШ, иккинчи ўринда Буюк Британия турибди — уларнинг захираси 5 млрд доллар атрофида.

Шу билан бирга, АҚШ ва Буюк Британия ушбу криптоактивларни асосан жиноятчилардан мусодара қилинган маблағлар ҳисобидан қўлга киритган.

Lazarus Group дунёдаги энг муваффақиятли жиноий кибергуроҳлардан бири ҳисобланади. Унинг ҳакерлик фаолияти орқали топган маблағлари Ким Жонг Ун режими учун муҳим молиявий манба бўлиб, жумладан, оммавий қирғин қуролларини ишлаб чиқиш дастурларини молиялаштиришда қўлланилади.

АҚШ Федерал тергов бюроси (FBI) маълум қилишича, Lazarus криптовалюта биржаси Bybitга уюштирилган ҳужумда 1,6 млрд долларлик Ethereumʼни ўғирлаган. Бу ҳажм Шимолий Кореянинг 2023 йилдаги ҳарбий бюджети (1,4 млрд доллар) дан ҳам юқори.

Бу ҳозиргача аниқланган энг йирик киберўғирлик ҳисобланади. Аввалги рекорд 2003 йилда Саддам Ҳусайн томонидан Ироқ Марказий банкидан ўғирланган 1 млрд долларга тегишли эди.

Криптобезопаслик соҳасида мутахассислашган TRM Labs маълумотларига кўра, 2025 йил феврал ойида дунё бўйлаб криптовалютада ўғирланган 1,7 млрд фунт стерлингнинг 35 фоизи Шимолий Корея ҳукумати билан боғлиқ ҳакер гуруҳларига тўғри келади.