Исроил яна Ғазога зарба берди: 12 киши ҳалок бўлди

15 февраль куни Исроил ҳужумлари оқибатида Ғазо секторининг турли ҳудудларида камида 12 нафар фаластинлик ҳалок бўлди ва яна бир неча киши жароҳатланди.

The Guardian’нинг Ғазо фуқаролик мудофаасига таяниб ёзишича, шимолдаги Жабалия шаҳрида чодирга берилган ҳаво зарбаси оқибатида беш киши ҳалок бўлган ва яна бир неча киши жароҳат олган.

«Исроил сулҳ ёки вақтинчалик тинчлик нима эканини тушунмайди», - деди Жабалиядаги ҳужумда жиянидан айрилган Осама Абу Аскар. Унинг айтишича, ҳалок бўлганлар ухлаб ётган пайтда зарба остида қолган.

Хон Юнусда эса тонг саҳарда алоҳида зарба оқибатида яна беш киши ҳалок бўлган. Шунингдек, Ғазо шаҳрининг жануби-ғарбида жойлашган Тал ал-Ҳава ҳудудида фуқаролар тўпланган жойга Исроил зарбаси берилиши оқибатида яна бир фаластинлик ҳалок бўлди ва бошқалар жароҳатланди.

Шимолий Ғазодаги Бейт Лаҳиа айланма йўли яқинида ҳам Исроил зарбаси яна бир кишини ўлдириб, уч кишини жароҳатлаган.

АҚШ воситачилигида тузилган ва ўтган ой иккинчи босқичига кирган сулҳга қарамай, Ғазода зўравонлик давом этмоқда.

«Охирги соатларда Исроил мудофаа кучлари кеча Бейт Ҳанун ҳудудида ҲАМАС сулҳ битимини очиқчасига бузганига жавобан зарбаларни бошлади,» дея Исроил ҳарбий расмийсининг сўзларини келтирмоқда Reuters.

Расмийга кўра, қуролли шахслар сулҳга мувофиқ ҳудудларни ажратиб турувчи «Сариқ чизиқ»нинг Исроил томонидаги туннель ичидан чиқиб келган.

Аслида Исроил сулҳ келишувига кўра қўшинларни олиб чиқиши назарда тутилган бўлса-да, «сариқ чизиқ» бир томонлама равишда Ғазо ичкарисига чуқурроқ кириб борган. Ҳамас эса қуролни ташлаш талабларини ҳозирча рад этиб келмоқда. Агар ҲАМАС қуролини ташламаса, Исроил уларни мажбуран қуролсизлантиришга тўғри келишини айтган.

ҲАМАС Тинчлик Кенгаши аъзоларини Исроилга босим ўтказишга чақирди

Ҳамас вакили Ҳазим Қосим Исроилни кўчирилган фаластинликларга қарши янги қирғин содир этишда айблади. Бу ҳодисалар Доналд Трамп «Тинчлик кенгаши»нинг илк йиғилишидан бир неча кун олдин — сулҳнинг жиддий бузилишидир.

Трамп эса урушдан кейинги режага мувофиқ Ҳамасни қуролсизланиш жараёнини давом эттиришга чақирди. Унинг айтишича, «Тинчлик кенгаши» аъзолари Фаластин ҳудудини қайта тиклаш учун 5 миллиард доллар ажратишга ваъда берган.

Трампнинг ушбу кенгашига Ўзбекистон ва Қозоғистон ҳам дохил 20 дан кўпроқ давлат қўшилган. Европаликлар унга қўшилишдан тийилмоқда. 19 февраль куни кенгашнинг илк йиғилиши бўлади.

Ҳазим Қосим «Тинчлик кенгаши»нинг илк йиғилишида қатнашадиганларни Исроилга сулҳни бузишни тўхтатиш ва келишувни кечиктирмасдан бажариш учун босим ўтказишга чақирди.

Ғазо соғлиқни сақлаш вазирлиги маълумотига кўра, Ғазо келишуви кучга кирганидан бери Исроил ҳужумлари оқибатида камида 600 фаластинлик ҳалок бўлган. Исроил эса шу даврда Ғазода тўрт аскари ўлдирилганини айтади.