“Юк машина бошқаришимга кўпчилик ишонмайди” – олтиариқлик гулчи аёл

Назира опа Қамбарова Олтиариқ туманининг Повулғон қишлоғидан. У юк машинасида иссиқхонада етиштирган гулларни атрофдаги бозорларга тарқатади. Гулчи опа иши юришиб кетганидан Россияда муҳожирликда юрган турмуш ўртоғи ва ўғлини ёнига чақириб олди.

Гулчи опа томорқасида қад ростлаган 2 сотих иссиқхонада 10 хилдан ортиқ гул парваришлайди. Унинг юк машина бошқариши кўпчиликни ҳайратга солади:

“Аслида гулчилик билан шуғуллансангиз, зерикмайсиз. Зерикиб қолсам, иссиқхона ичида мусиқани қўйиб, рақс тушиб оламан-да, яна ишимни давом эттиравераман. Гуллар бепарволикни ёқтирмайди. Уларга доим меҳр бериб туриш керак. Ўзимнинг асл соҳам ҳамширалик. Гулчилик қўшимча иш. Етиштирган гулларимнинг ҳаммасини ҳам уйда сота олмайман.

Гулларни “Ford”га юклаб, атрофдаги бозорларга тарқатаман. Аёл киши бўлсам ҳам юк машинасини яхши бошқара оламан. Йўлда “ГАИ”лар тўхтатишади. Бошқарувда аёл киши ўтирганини кўриб ҳайрон бўлишади. “Аёлларда ичкилик бўлмайди. Қоидани яхши биламиз. 50-60 тезликдан ўтмайман. Йўл ҳаракати қоидаларига қатъий амал қилиб юраман”, десам, “опа, газини босинг”, дейишиб, ҳурматимни жойига қўйиб, оқ йўл тилашади. Дастлаб “Ford” ҳайдаб машина бошқаришни ўрганганман. Уни бошқариш мен учун жуда осон.

Ишимдан доим завқланаман. 55 ёшга кирдим. Лекин ҳали ортга чекиниш йўқ. Энди бундан-да катта машиналар бошқариб, жаҳон бозорларига ўзим етиштирган гулларни олиб бориш ниятим бор.

95 ёшга кирган кекса қайнотам биз учун давлат. Баракамиз, ризқимиз, ютуғимиз ҳам шу отахоннинг дуоси билан. Қайнотам менга доим далда бериб туради”, дейди Назира опа Қамбарова.