Испания TVE давлат телеканали қарийб 3 минг киши шаҳарга кириб келгани ҳақида хабар берган. Испания фуқаролик гвардияси бу рақамни тасдиқламаган. RTVE телекомпаниясига кўра, сўнгги икки ҳафта ичида Сеутага 1,5 мингдан ортиқ киши кириб келган – улар асосан марокашлик ёшлардир.
Интернетда тарқалаётган видеокадрларда пуфлаб шиширилган қайиқларда сузиб келган юзлаб мигрантлар қирғоққа чиқиб олганидан кейин блокпост дарвозасини бузиб ўтиши ва Сеута ичкарисига интилишини кўриш мумкин. Улардан айримлари «Испанияга шон-шарафлар бўлсин!» дея ҳайқиради.
Марокашнинг шимолий қирғоғида жойлашган Сеута Гибралтар бўғози орқали Испаниянинг материк қисмидан ажралиб туради ва узоқ вақтдан бери Европага боришга уринаётган муҳожирлар учун нишон бўлиб келган.
Испания Олий суди июл ойи бошида Сеутага етиб боришга уринаётганда денгизда қўлга олинган муҳожирларни расмийларга чегара тўсиқларини кесиб ўтишга уринаётганда қўлга олинган одамларни зудлик билан қайтариб юбориш имконини берувчи соддалаштирилган тартибда қайтариб юборилмаслиги ҳақида қарор чиқарди. Испания ҳукумати таъкидлашича, «мафия ва жиноий ташкилотлар ушбу қарордан фойдаланиши» миграция кучайишига сабаб бўлган.
AFP журналистига кўра, пайшанба куни кечқурун Испаниянинг Сеута шаҳри билан чегара очилгани ҳақидаги миш-мишлар тарқалгач, юзлаб одамлар Марокаш шимолидаги Фнидк шаҳрига оқиб келишган.
«Бу жуда оғир эди. Полиция бизни тўхтатишга уринди. Аммо иродамиз ва қатъиятимиз бу ерга етиб келишимизга имкон берди», – дея анклавга кириб келганлардан бири Жадид Закариёнинг сўзларини келтиради Reuters агентлиги.
«Олий суд қарори чиққанидан бери оқим кичик эди, лекин бугун у кескин кучайди», – деган Испания фуқаролик гвардияси вакили нашрга.
Расмийларга кўра, пайшанба куни сувдан тўққиз кишининг жасади топилган, сўнгги ойларда Сеутага келишга уриниш чоғида ҳалок бўлганлар сони 60 нафарга етган.
Ҳукумат хабарига кўра, Испаниянинг материк қисмидан анклавга мавжуд хавфсизлик кучларини кучайтириш учун полиция махсус бўлинмасининг 200 нафар ходими ва 60 нафар ҳарбий хизматчи юборилган.
Сўнгги воқеалар 2021 йилги инқирозни эслатмоқда, ўшанда 85 минг киши истиқомат қилувчи анклавга Марокаш ва Африканинг бошқа мамлакатларидан 10 мингга яқин одам келганди.
Испания бош вазири Педро Санчес жума куни ички ишлар вазири Фернандо Гранде-Марласка билан бирга Сеутага келиши ҳамда маҳаллий расмийлар билан учрашиши кутилмоқда.
Сеута марказидаги аёллар кийимлари дўкони эгаси Энрике Серранонинг Reuters агентлигига айтишича, тадбиркорлар полиция ресурслари етишмаслигидан қўрқиб, ўз-ўзини ҳимоя қилиш гуруҳларини ташкил қилмоқда.
Сеута ва Мелиля (Шимолий Африкада жойлашган яна бир Испания автоном шаҳри) Европа Иттифоқидаги Африка билан қуруқлик чегараси бўлган ягона аҳоли пунктларидир. Ҳар икки шаҳарда ҳам Европага киришга интилаётган муҳожирларнинг чегарани ноқонуний кесиб ўтишга уринишлари вақти-вақти билан кўпайиб бормоқда.
Reuters таъкидлашича, Европа Иттифоқида Испания социалистик ҳукумати ўз муҳожирлик позицияси билан ажралиб туради. Испания ҳукумати яқинда 500 мингга яқин ҳужжатсиз муҳожирга қонуний мақом бериш дастурини ишга туширди, бу эса бу рақамдан икки баравар кўп аризалар тўлқинини келтириб чиқарди.
Ўнг партиялар Санчесни Сеутдаги вазиятнинг инқирозли даражага етишига йўл қўйганликда айбламоқда. Консерватив Халқ партияси етакчиси Алберто Нунес Фейхоо Х ижтимоий тармоғида шундай деб ёзди: «Сеутада умидсиз вазият. Ҳукумат бунга кўз юмиши мумкин эмас, чунки биз миллий хавфсизлик инқирозига дуч келмоқдамиз».
Сеута мэри Хуан Хесус Вивас Испания ҳукуматини муҳожирларнинг оммавий оқими туфайли фавқулодда ҳолат эълон қилишга чақирди.
