Испаниянинг Марокаш билан чегарадош бўлган Сеута автоном шаҳри раҳбари Хуан Хесус Вивас сўнгги кунларда мигрантлар оқими кескин кучайганини маълум қилди. Унинг сўзларига кўра, қабул марказлари тўлиб кетган, денгиз орқали ўтишга уринганлар орасида қурбонлар ҳам кўпаймоқда.
Маҳаллий ҳокимият маълумотига кўра, сўнгги кунларда Сеутага етиб келишга уринган камида тўққиз нафар мигрант денгизда ҳалок бўлган.
AFP агентлиги қайд этишича, бу 2021 йилдан буён кузатилган энг йирик мигрантлар оқими ҳисобланади. Ўшанда 10 мингдан ортиқ киши Сеута чегарасини кесиб ўтишга уринган эди.
Испания бош вазири Педро Санчес ҳукумат вазиятга зудлик билан жавоб қайтариш учун барча зарур ресурсларни сафарбар этганини билдирди. Мамлакат Ички ишлар вазирлиги эса шаҳарда хавфсизликни таъминлаш мақсадида ҳарбий хизматчилар юборилганини маълум қилди.
Ички ишлар вазири Фернандо Гранде-Марласка 31 июл куни Сеутага ташриф буюриши кутилмоқда. У Марокаш ҳукумати билан ҳамкорликни юқори баҳолаб, икки давлат ноқонуний равишда Сеутага кирган шахсларни имкони борича тезроқ Марокашга қайтариш бўйича ҳамкорлик қилаётганини таъкидлади.
Associated Press маълумотига кўра, маҳаллий ҳокимият мигрантлар оқимининг кучайишини Испания Олий судининг июл ойи бошида қабул қилган қарори билан боғламоқда. Унга кўра, денгиз орқали мамлакатга келган мигрантларни тегишли ҳуқуқий тартиб-таомилларсиз дарҳол орқага қайтариш мумкин эмас. Бу тартиб қуруқлик орқали чегарани ноқонуний кесиб ўтганларга нисбатан амал қилмайди.
Сеута ва Мелиля Испаниянинг Африкада жойлашган икки эксклави бўлиб, улар орқали кўплаб африкалик мигрантлар Ғарбий Европа давлатларига етиб боришга ҳаракат қилади. Марокаш эса уларнинг аксарияти учун Европага йўлдаги асосий транзит мамлакат ҳисобланади.
