Дунёдаги энг йирик компаниялардан бири сунъий интеллект сабабли 30 минг ходимини ишдан бўшатди

Собиқ ходимларнинг айтишларича, уларни сунъий интеллект тизимларини такомиллаштиришга мажбурлашган.

Фото: Oracle

Американинг Oracle корпорацияси сунъий интеллектга ўтиш доирасида 30 минг нафар ходимини ишдан бўшатди, деб ёзади Time.

Компанияда 30 йил ишлаган ходимлардан бири ишдан бўшатилганини шифохонада ётган пайтида телефон орқали билган.

Собиқ ходимларнинг айтишларича, уларни сунъий интеллект тизимларини такомиллаштиришга мажбурлашган.

17 апрел куни 600 нафар ходим таътил пулларини ошириш, тиббий суғуртани узайтириш ва ишчи визасига эга ходимларни қўллаб-қувватлашини сўраб раҳбариятга мактуб ёзган. Oracle мурожаатларни фақат индивидуал тарзда кўриб чиқишини билдирган.

Айниқса хорижлик ишчиларга қийин бўлиши айтилмоқда. Уларнинг янги ишхона топиш учун 60 кун вақти бор, акс ҳолда АҚШни тарк этишларига тўғри келади.

Oracle — дастурий таъминот ишлаб чиқувчи компания бўлиб, Microsoft’дан кейин иккинчи ўринда, ахборот технологиялари соҳасида тўртинчи ўринда туради (Alphabet, Microsoft ва IBM корпорацияларидан кейин). 2025 йил ҳолатига дунё бўйича унинг ходимлари сони 162 минг нафарни ташкил этган.