Фарзанд туғилганда отага ҳам таътил берилиши мумкин

Ўзбекистонда меҳнат муносабатларини такомиллаштиришга қаратилган қонун лойиҳаси 5 май куни депутатлар томонидан биринчи ўқишда қабул қилинди.

“Миллий тикланиш” партияси хабарига кўра, ушбу қонун лойиҳасида ишли эркаклар фарзандли бўлганда хотинига ёрдам бериш ва бошқа фарзандларига қараб туриши учун қисқа муддатли таътил бериш белгиланмоқда. Унинг миқдори хабарда келтирилмаган. Лойиҳа билан амалдаги қонунчиликка бу бўйича ўзгартириш ва қўшимчалар киритиляпти.

Бундан ташқари, таъкидланганишича, қонун лойиҳаси меҳнат муносабатларини расмийлаштиришни соддалаштириш, ортиқча бюрократик тўсиқларни бартараф этиш ҳамда ходимларнинг ҳуқуқларини ишончли ҳимоя қилишга қаратилган.

Хусусан, ишга қабул қилишда талаб этиладиган ҳужжатлар рўйхати қисқартирилмоқда. Таклиф этилаётган тартибга кўра, фуқарони ишга қабул қилишда асосан унинг шахсий идентификация рақами талаб этилади. Ҳарбий хизматга мажбурлар ва чақирилувчилар эса ҳарбий гувоҳнома ёхуд ҳарбий ҳисобда турганлик ҳақидаги гувоҳнома тақдим этиши лозим.

Қонун лойиҳасида меҳнат муносабатларини рақамлаштиришга ҳам алоҳида эътибор қаратилган. Ишга киришда электрон меҳнат дафтарчасидан кўчирма бериш бекор қилинмоқда. Шунингдек, электрон рақамли имзо ёки биометрик идентификация (Face-ID) орқали тасдиқланган ҳужжатлар юридик жиҳатдан қўлда имзоланган ҳужжатлар билан тенглаштирилмоқда.

Қонун лойиҳасида меҳнат жараёнида тазйиқ ва зўравонликка қарши курашишга доир нормалар ҳам ўз аксини топган. Жумладан, бундай ҳолатларни тақиқлаш, уларнинг олдини олиш ва жабрланган ходимларни ҳимоя қилиш чоралари белгиланмоқда.

Бундан ташқари, иш берувчи томонидан иш ҳақи тўлаш муддати бузилган тақдирда, ҳар бир кечиктирилган кун учун пулли компенсация тўлаш тартиби аниқлаштирилмоқда.

Муҳокамалардан сўнг, қонун лойиҳаси депутатлар томонидан биринчи ўқишда қабул қилинди.