Россия ва Украина вакиллари биринчи хоним Мелания Трамп билан учрашганидан сўнг, АҚШ президенти Владимир Путиннинг махсус вакили Кирилл Дмитриев билан алоҳида ёпиқ учрашув ўтказди. Овал кабинетда журналистларнинг саволларига жавоб берар экан, Трамп шундай деди:
«Айнан нимани муҳокама қилганимни сизга айта олмайман. Лекин шунчаки бир нарсани айтаман: бу келишув бўлади, ўзиям катта келишув бўлади. У жуда йирик бўлади. У нафақат Украинага, ҳатто айтишим мумкинки, умуман бутун Европага дахлдор бўлиши мумкин. Бу катта, ажойиб битим бўлади ва барчанинг боши осмонга етади».
Шунингдек, у АҚШ «Россия ва Украина масаласини ҳал қилишга» «жуда яқин» қолишига ишонаётганини қўшимча қилди.
Трамп алоҳида учрашувни фақат Россия вакили билан ўтказганини, Украина вакиллари билан эса учрашмаганини аниқлаштирди.
Трамп 2025 йил июль ойида имзолаган ҳамда Оқ уйдаги иккинчи муддатининг асосий ташаббусига айланган қонун ҳақида ҳам худди шундай иборалар билан (big beautiful bill) гапирган эди. Ушбу қонун, хусусан, ноқонуний мигрантларга қарши курашиш мақсадида федерал солиқларни камайтириш ҳамда мудофаа ва чегара хавфсизлиги харажатларини оширишни кўзда тутарди.
