Уруш давом этади
Ҳафта давомида АҚШ Эронни бомбалашни давом эттирди. Трамп айтарли сабабсиз урушни қайталаб юборди. Эсингизда бўлса, томонлар 17 июн куни 60 кунлик ўт очишни тўхтатиш бўйича келишиб олган, ҳар икки давлат президенти англашув меморандуми имзолаганди. Ўшанда бу жуда мўрт келишув бўлганини айтгандик. Кўриб турибсиз, ҳеч қандай сулҳ бўлмади, уруш тугамади, Америка Эронга янада жиддий зарба беришни ўйламоқда. Бу гал энергия объектлари, кўприклар ва бошқа инфратузилма манзилгоҳлари нишонга олиниши мумкин.
Америка нашрларига кўра, Вашингтон Исроилга қўшимча 30 та ёнилғи самолётлари юборган, ҳали яна юбораркан. Ҳавода қирувчи самолётларга ёнилғи қуювчи бунақа учоқлар Исроил ва Америка катта операция бошлаётганини билдиради. Қирувчилар авжига чиқиб ракета отаётганда ерга қўниб ўтирмасин деб мана шунақа учоқлар ўйлаб топилган.
Эрон ҳам қўлида бор қуролларни Американинг Яқин Шарқдаги базаларига отяпти. Бу орада уруш қайталаниши ҳақида минг хил версия ўртага чиқди. Хусусан, Трамп Исроил босими билан урушни қайталади. деган гап кўп тилга олинмоқда. Хуллас, бу уруш ҳали бери тугайдиганга ўхшамайди. Исроил келишув меморандуми имзолангач, жуда норози бўлганди. Улар Эронни буткул йўқ қилмагунча тинчимоқчи эмас. Бу эса имконсиз нарса, Эрон бошидан охиригача 40 км келадиган Ғазо эмас ахир.
Сенаторнинг ўлими
Америкалик сенатор Линдси Гремнинг ўлими катта воқеа бўлди. Трампнинг энг яқин маслаҳатчиларидан бири бўлган Грем Эронда уруш бошланишининг асосий ташаббускорларидан эди. Шунингдек, Украинага нисбатан танқидий қарашда бўлган Трампдек президент даврида Грем Киевни ашаддий қўлловчи сиёсатчи эди. Ўлимидан бир кун аввал сенатор Киевда Зеленский билан учрашган. Шу сабаб унинг ўлими ҳақида турли шубҳа-гумонлар кўпайди.
Россия ва Эрондан «сенаторни Исроил ўлдириб, Трампга сигнал юборди» деган версия тарқалди. Кўпчилик бу одам 71 ёшда бўлгани учун ўз ўлими билан вафот этиши табиий ҳол деб ўйлаётгани йўқ. Чунки бунақа катта одам кутилмаганда ўлиши барибир гап-сўзни кўпайтиради.
Украинада намойишлар
Ҳафта давомида Украинада навбатдаги марта ҳукуматни янгилаган Зеленскийга қарши намойишлар авж олди. Бу галги ўзгаришларнинг энг жиддийси мудофаа вазири Фёдоров истеъфоси бўлди. Катта эҳтимол Лвивдаги ҳарбий комиссарият билан кузатилган можаро сабаб ишдан олинган Фёдоров аллақачон украин жамиятининг меҳрини қозонганди.
У пиарчи мулозимлардан эмас, дастурчиликдан чиққан йигит дрон ишлаб чиқариш тизимини йўлга қўйиш орқали Украина армиясини яхшигина кучайтирганди. Фёдоровнинг муваффақиятини кўрган Зеленский унга мудофаа вазири лавозимини ишониб топширганди. Янги вазир даврида Украина дрон урушида Россияни енгаётганини бутун мамлакат кўриб турганди, шу сабаб одамлар кўчага чиқиб Зеленскийнинг қарорига норозилик билдирди.
Президент ёш Фёдоровга ўзининг сиёсий рақиби деб қарамоқда деб ўйлай бошлашди. Агар яқин ўртада сайлов бўлса, чиндан шунақа бўлиши мумкин. Ҳали Лондондаги элчи Залужний президент бўламан деб юрибди. Хуллас, Зеленский учун синовли давр бошланмоқда. Фёдоровга эса шунчаки қойил қолиш керак. Ортиқча гап-сўзсиз, пиар рекламасиз, мудофаа вазири лавозимида ишлаб, урушаётган халқ меҳрини қозониш осон иш эмас.
Месси ҳаммани жим қилди
Америкада футбол бўйича жаҳон чемпионати якунланай деб қолди. Бугун тунда ғолиб номи аниқланади. Кубок учун амалдаги чемпион Аргентина ва 2010 йилги чемпион Испания курашади. «Барселона» мухлислари учун байрам бўлди, бир томонда Месси, бир томонда Ямал, ким ютса ҳам хурсанд бўлишга асос бор. Лекин барибир ўтмишдаги хотиралар ҳурмати кўпчилик «Барса»чилар Мессини қўлласа керак.
Яримфиналлар жуда зўр ўтди. Икки баҳсда ҳам кўпчилик фаворит деб ҳисоблаган жамоалар енгилди. Франция гўёки бекам-у кўстдек кўринаётганди, аммо Испания французларга тўп бермай сарсон қилди. Родрининг марказдаги ўйини алоҳида санъат асарига айланиб кетди. Ўйинни тўлиқ назорат қилган Испания 2:0 ҳисобида ғалаба қозонди.
Иккинчи яримфинал эса тарихий бўлиши аниқ эди. Англия ва Аргентина ўртасидаги эпик қарама-қаршилик афишани оқлади. Аввалига инглизлар ҳисобни очди. Лекин Жамолиддин Бобожонов таъбирлари билан айтганда, инглизлар ўзи урган голдан ўзи қўрқиб кетди. Ўйин якуни арафасида Месси фантастик ўйин кўрсатиб, иккита голга ассистентлик қилди. Энцо ва Лаутаро даҳонинг узатмаларини голга айлантириб, финал йўлланмасини ҳал қилди.
Лео жисмоний курашда ҳам, руҳий курашда ҳам, барчасида рақиблардан устунлик қилди. Ўйиндан кейин ҳатто Англия футболи афсоналари Месси тарихдаги энг зўр футболчи экани ҳақида гапирди, у инглизларга қарши ўйинда чинакам гладиаторга айланди. Конспирологларда айтадиган янги гап ҳам қолмади, Лео ҳаммани жим қилиб қўйди.
Бугун катта эҳтимол Мессининг мундиаллардаги энг охирги ўйини бўлади. Маслаҳатим, футбол даҳосининг энг сўнгги ўйинидан завқланинг. Қариганда Мессининг ўйинларини жонли кўрганман деб мақтаниб юрасиз...
