«Дунё» ахборот агентлиги маълум қилишича, фуқаро М.Х. 2025 йилда Чехияга келган ва кейинчалик меҳнат фаолияти муносабати билан Польшанинг Вроцлав шаҳрида вақтинча яшаган. 2026 йил феврал ойида Прагада бўлган вақтида унинг хорижга чиқиш паспорти ўғирлаб кетилган.
Шундан сўнг у шахсини тасдиқловчи ҳужжатларсиз қолиб, ҳуқуқий мақомини тиклаш ҳамда Ўзбекистонга қайтишда қийинчиликларга дуч келган.
Фуқаронинг мурожаатидан кейин Ўзбекистоннинг Чехиядаги элчихонаси томонидан зудлик билан консуллик-ҳуқуқий ёрдам кўрсатилди. Кўрилган чоралар натижасида унинг депортация қилиниш хавфи бартараф этилди ҳамда Ўзбекистонга қайтиш гувоҳномаси расмийлаштириб берилди.
Шунингдек, Чехия Ички ишлар вазирлиги билан ҳамкорликда ватандошнинг авиачипта харажатларининг бир қисми Чехия томонидан қоплаб берилди. Натижада у соғ-саломат Ўзбекистонга қайтиб келди.
Қайд этилишича, Ўзбекистоннинг хориждаги дипломатик ваколатхоналари чет элларда мураккаб вазиятга тушиб қолган фуқароларга ҳуқуқий ва консуллик ёрдамини кўрсатиш, шунингдек, уларнинг қонуний ҳуқуқ ва манфаатларини ҳимоя қилиш бўйича ишларни изчил давом эттирмоқда.
