Kun.uz аввалроқ Тошкент шаҳридаги янги автобус бекатлари ҳақида аҳоли вакиллари фикрини ёритган эди. Таҳририят навбатдаги материалида бекатларни ўрнатаётган компания ва пойтахт расмийлари изоҳини тақдим этади.
Маълум қилинишича, бекатларни ўрнатишга давлат маблағлари ишлатилмаяпти, барча харажатлар бу ҳуқуқни аукционда ютиб олган компания ҳисобидан амалга ошириляпти.
Тадбиркор киритган инвестициясини бекатларда реклама жойлаш ва вендинг аппаратлари орқали чиқариб олишни кўзлаган.
“Бюджетдан пул олмаяпмиз”
Янги бекатларни қуриш ва реконструкция қилиш ишлари очиқ электрон аукционлар орқали амалга оширилмоқда. Аукционларда 230 та бекат бўйича ижара ҳуқуқини “Ewi Snacks” МЧЖ ютиб олган.
Корхона бу бекатларни намунавий лойиҳа асосида реконструкция қилиш, камида 70 тасига вендинг аппарати ўрнатиш ва яна 230 та ижтимоий бекат (четроқ жойларда) қуриш мажбуриятини олган.
“Хусусий тадбиркор сифатида ҳаммасини ўзимизнинг маблағимиз ҳисобидан қиламиз. Бюджетдан ёки давлат жамғармаларидан пул олмаймиз”, – деди Ewi Snacks вакили Жаҳонгир Абдураҳмонов.
Унинг сўзларига кўра, компания бекатларни ташкил этиш ишларини босқичма-босқич олиб боряпти: аввалига бекатларнинг конструкциялари ўрнатиб чиқилган, шундан кейин перронлар, ўриндиқлар, чиқинди қутилари кабилар қўйиб бориляпти. Ҳозирча 200 дан ортиқ бекатлар ярим тайёр ҳолатда, яъни улардаги энг муҳим олтита элемент ўрнатиб бўлинган.
Тадбиркор Kun.uz билан суҳбатда бекат элементларининг нархини айтиб ўтди. Унга кўра, перрон – 24 млн сўм, конструкция – 21 млн сўм, лайтбокслар (реклама монитори) – 8-9 млн сўм, электрон табло – 5-5,5 млн сўм, камералар – 2-4 млн сўм, ўриндиқ – 2 млн сўм, электр тармоғи тортиш айрим жойларда 12 млн сўмгача, вендинг аппарати эса 36–40 млн сўм туради. Бундан ташқари, интернет ва SOS тугмаси фаол ишлаб туриши учун ҳар ой абонент тўловлари тўланади.
“Эътирозлар инобатга олинади”
Қайд этиш керак, амалда пойтахтдаги кўплаб эски бекатлар талабга жавоб бермайдиган перрон устидаги металл соябон ва ўриндиқдан иборат бўлиб, улардан ташқари фақат чиқинди қутиси ва автобуслар графиги кўрсатилган металл лавҳа бор холос.
Янги бекатлар эса имконияти чекланган шахсларга мослаштирилган перрон, автобус келиш вақтини кўрсатадиган электрон табло, хавф тугмаси, кузатув камераси ва вендинг аппаратлари каби қулайликларга эга бўлади. Бекатни ижарага олган корхона бекатнинг тозалиги ва қутилардаги чиқиндиларни олиб кетишни ҳам таъминлайди.
Йўл ҳаракатини ташкил этиш маркази ходими Оллоёр Норбўтаевнинг айтишича, ижтимоий тармоқларда билдирилаётган фикр ва таклифларни инобатга олган ҳолда, кўпроқ соя тушиши ва ёғингарчиликдан яхшироқ пана қилиши учун янги бекатларнинг том қисмини кенгайтириш, бекат томида иссиқликни қайтарадиган материаллардан фойдаланиш ва тадбиркорнинг ташаббуси билан аҳоли гавжум айрим бекатларда вентиляторлар ўрнатиш режа қилинмоқда.
Унинг қўшимча қилишича, баъзи ҳолатларда бекат дизайнини тубдан ўзгартириш имконсиз: масалан, Фарғона йўли кўчасида бекатлар асосий йўл ва қўшимча йўл ўртасида жойлашган бўлиб, у ердаги мавжуд шароит бекатга соя тушишини таъминлаш имконини бермайди.
Тошкент шаҳар транспорт бошқармаси бошлиғи Миракбар Икромовнинг сўзларига кўра, пойтахтда 2871 та автобус бекати мавжуд бўлиб, шундан 753 таси дўконли бекатлар, 700 тадан ортиғи эса етарлича жиҳозланмаган – 2026-2027 йилларда уларни қайта реконструкция қилиш режа қилинган.
2026 йил декабрига қадар жами 496 та бекат фойдаланишга топширилиши кутиляпти. Шундан 230 таси тўлиқ замонавий, қолганлари эса соддароқ ижтимоий бекатлар бўлади.
Масъуллар аҳоли танқидлари лойиҳа учун фойдали эканини, жамоатчиликнинг ўринли таклифлари асосида бекатлар дизайни ва қулайликлари такомиллаштирилаётганини билдирди.
