DW нашрининг хабар беришича, Пуэнте бу ҳақда 3 ноябр куни кечқурун Мадридда парламент комиссияси олдида сўзлаган нутқида маълум қилган. Унинг истеъфоси фожиадан қарийб бир ҳафта ўтиб эълон қилинди.
«Бир йилга етмаган вақт ичида бундай кўламдаги иккита ҳалокатдан кейин вазир ўз лавозимида қолиши мумкин эмас», — деган Пуэнте. У истеъфога чиқиш қарорини сиёсий шаън ва масъулият масаласи билан изоҳлаган.
dpa агентлигига кўра, вазирнинг истеъфосини барча мухолифат партиялари талаб қилган. Бироқ Пуэнте ва Испания бош вазири Педро Санчес бунга қадар вазирнинг лавозимдан кетиши эҳтимолини бир неча бор рад этгани учун бу қарор кутилмаган бўлган.
Пуэнтенинг баёнотидан бир неча соат олдин Испания ҳукумати темирйўл қатнови хавфсизлигини ошириш чораларини тасдиқлаган. Шунингдек, жабрланганлар ва ҳалок бўлганларнинг оилалари учун 30 миллион евро миқдоридаги ёрдам пакети маъқулланган.
Темирйўл ҳалокати 28 октябр куни соат 08:53 да Толедо провинциясидаги Урда аҳоли пункти яқинида, Мадрид — Севиля тезюрар темирйўл йўналишида юз берган. AVE 2080 йўловчи поезди йўлда тўхтаб турган Iryo 6076 поездининг охирги вагонига бориб урилган. Оқибатда 69 киши ҳалок бўлган, 50 дан ортиқ одам жароҳатланган.
2026 йил бошидан буён Испанияда йўловчилар жабрланган еттита темирйўл ҳалокати қайд этилган. Улардан яна бири 18 январ куни Мадрид — Малага тезюрар йўналишида, Адамус аҳоли пункти яқинида содир бўлган. Икки поезд иштирокидаги ўша ҳалокатда 46 киши ҳаётдан кўз юмган, яна 150 киши турли даражада жароҳат олган.
Адамусдаги ҳалокатнинг эҳтимолий сабабларидан бири сифатида темирйўл изларининг шикастлангани кўриб чиқилмоқда. Урдадаги ҳодиса бўйича терговда эса поездларни автоматик ҳимоялаш тизими ишдан чиққан бўлиши ҳамда диспетчерлик маркази кўрсатмаларида эҳтимолий хатоларга йўл қўйилгани текширилмоқда.
